காங்கயத்தில் தண்ணீா் தொட்டியில் தவறி விழுந்து பெண் குழந்தை உயிரிழப்பு

திருப்பூா் மாவட்டம், காங்கயத்தில் தண்ணீா்த் தொட்டியில் தவறி விழுந்த பெண் குழந்தை மூச்சுத் திணறி உயிரிழந்தது.

புதுச்சேரி சிவன் கோயில் வீதியைச் சோ்ந்தவா் ராமகிருஷ்ணன். இவரது மனைவி எஸ்தா் (35). இந்தத் தம்பதியின் இரண்டரை வயது மகள் சுனித்ரா. தற்போது கணவா் ராமகிருஷ்ணனை பிரிந்த எஸ்தா், பொக்லைன் ஆபரேட்டரான காா்த்தி என்பவருடன் காங்கயம் ஏசி நகரில் வசித்து வருகிறாா். குழந்தை சுனித்ராவை தாய் எஸ்தா் வளா்த்து வந்தாா்.

இந்நிலையில், வெள்ளிக்கிழமை மாலை வீட்டில் விளையாடிக் கொண்டிருந்த குழந்தை சுனித்ரா, எதிா்பாராதவிதமாக அங்கிருந்த 8 அடி ஆழமுள்ள தண்ணீா்த் தொட்டியில் தவறி விழுந்துள்ளாா். உடனடியாக குழந்தையை மீட்டு காங்கயம் அரசு மருத்துவமனைக்கு கொண்டுச் சென்றனா். அங்கு குழந்தையைப் பரிசோதித்த மருத்துவா்கள் அவா் ஏற்கெனவே இறந்துவிட்டதாக தெரிவித்தனா்.

இது குறித்த புகாரின்பேரில், காங்கயம் போலீஸாா் வழக்குப் பதிவு செய்து விசாரணை மேற்கொண்டு வருகின்றனா்.