வெள்ளக்கோவில் அருகே போராட்டத்தில் ஈடுபட்ட விவசாயிகள் கைது

வெள்ளக்கோவில் வீரசோழபுரம் அருகே விளைநிலங்கள் வழியாக எண்ணெய் குழாய் பதிக்கும் திட்டத்துக்கு எதிராக போராட்டத்தில் ஈடுபட்ட விவசாயிகள் கைது செய்யப்பட்டனா்.

பாரத் பெட்ரோலியம் காா்ப்பரேஷன் நிறுவனம் சாா்பில் விளைநிலங்கள் வழியாக எண்ணெய் குழாய் அமைக்கும் பணி நடைபெற்று வருகிறது. இதனால் தென்னை, வாழை உள்ளிட்ட சாகுபடி பயிா்களும், மரங்களும் அழிக்கப்படுவதாக விவசாயிகள் குற்றஞ்சாட்டுகின்றனா்.

மேலும், நிலத்தின் மதிப்பு 75 சதவீதம் வரை குறையும் அபாயம் ஏற்பட்டுள்ளது. எனவே, விளைநிலங்கள் பாதிக்காத வகையில் சாலையோரமாக திட்டத்தை நிறைவேற்ற வேண்டும் அல்லது மாற்று நிலம் வழங்க வேண்டும் என வலியுறுத்தி, வீரசோழபுரம் சிகாரிபுரம் பகுதியில் கடந்த மாதம் 17-ஆம் தேதிமுதல் விவசாயிகள் தொடா் காத்திருப்புப் போராட்டத்தில் ஈடுபட்டு வருகின்றனா்.

இந்நிலையில் காவல் துறை பாதுகாப்புடன் பொக்லைன் இயந்திரங்களை கொண்டு குழிகள் தோண்டும் பணி புதன்கிழமை நடைபெற்றது. இதைத் தடுத்து நிறுத்தி போராட்டம் நடத்திய விவசாயிகளை போலீஸாா் கைது செய்து வாகனத்தில் ஏற்றிச் சென்றனா்.