சேலம் மத்திய சிறைக்கு வந்தது வெடிகுண்டு கண்டறியும் "அக்னி' மோப்ப நாய்

சேலம், அக். 8: சேலம் மத்திய சிறையில் வெடிகுண்டு, போதைப்பொருள் நடமாட்டத்தைக் கண்டுபிடிப்பதற்காக, அக்னி என்ற லேப்ரடார் இன நாயும், ஜான்சி என்ற ஜெர்மன் ஷெப்பர்டு இன நாயும் வாங்கப்பட்டது.

 3 மாத குட்டிகளாக இருந்த 2 நாய்களுக்கும் கோவை பயிற்சி மையத்தில் 6 மாத பயிற்சி அளிக்கப்பட்டது. பயிற்சி நிறைவடைந்ததால், அக்னி மோப்ப நாய் சேலம் மத்திய சிறைக்கு வியாழக்கிழமை கொண்டு வரப்பட்டது. மற்றொரு நாயான ஜான்சிக்கு, கல்லீரலில் கோளாறு இருப்பதால் நாமக்கல் கால்நடை மருத்துவக் கல்லூரிக்கு சிகிச்சைக்காக கொண்டுச் செல்லப்பட்டுள்ளது.

 சிறப்புப் பூஜை: சேலம் கொண்டு வரப்பட்ட அக்னிக்கு, சேலம் அஸ்தம்பட்டி சிறையில் உள்ள முனியப்பன் கோயிலில் சிறை கண்காணிப்பாளர் பரமேஸ்வரன் தலைமையில் சிறப்பு பூஜை நடத்தப்பட்டது.

 ரூ.2 லட்சத்தில் கட்டடம்: சேலம் சிறைக்குள் தங்க வைக்கப்படும் அக்னி, ஜான்சிக்காக ரூ.2 லட்சத்தில் புதிதாக தங்குமிடம் கட்டப்பட்டுள்ளது. கொசு கடிக்காமல் இருக்க கொசு வலை, தனித் தனியே கழிப்பிடம், குளியலறைகள் அமைக்கப்பட்டுள்ளன. இவற்றை பராமரிக்க 4 பேர் நியமிக்கப்பட்டுள்ளனர்.

 உணவு: 2 நாய்களுக்கும் உணவாக தினசரி தலா 350 கிராம் சோள மாவு உள்ளிட்ட தானியங்களால் தயாரிக்கப்பட்ட சத்துணவு, 2 முட்டைகள், மாமிசம் போன்றவை வழங்கப்படுகின்றன. இவற்றின் பராமரிப்புச் செலவுக்கு மாதம் ரூ.4,500 ஒதுக்கப்பட உள்ளதாக சிறை வட்டாரங்கள் தெரிவிக்கின்றன.