அரூா், பாப்பிரெட்டிபட்டி வட்டாரத்திலுள்ள ஏரிகளை குடிமராமத்து திட்டத்தில் தூா்வார வலியுறுத்தல்

அரூா் வட்டாரப் பகுதியிலுள்ள ஏரிகளை குடிமராமத்துப் பணிகள் திட்டத்தின்கீழ் தூா்வர வேண்டும் என பொதுமக்கள் வலியுறுத்தியுள்ளனா்.

தருமபுரி மாவட்டம், அரூா், பாப்பிரெட்டிப்பட்டி வட்டாரப் பகுதியில் ஏரிகள், குளம் குட்டைகள், நீா்வரத்து கால்வாய்கள் பல ஆண்டுகளாக தூா்வாரப்படாமல் உள்ளன. இதனால், பருவமழைக் காலங்களில் மழைநீரைத் தேக்கி வைக்கவும், மழைநீா் வழிந்தோடுவதற்குத் தேவையான கால்வாய் வசதிகளும் இல்லை.

தருமபுரி மாவட்டத்தில் பாலக்கோடு, பென்னாகரம், நல்லம்பள்ளி, காரிமங்கலம், தருமபுரி வட்டாரப் பகுதியிலுள்ள ஏரிகள் உள்ளிட்ட நீா்நிலைகள் குடிமராமத்துப் பணிகள் திட்டத்தில் தூா்வரப்பட்டுள்ளன. இதனால், அங்குள்ள ஏரிகளில் தண்ணீா் தேங்கி நிற்கிறது. வேளாண் பணிகளும் மேம்பாடு அடைந்துள்ளன.

அதேபோல் அரூா், பாப்பிரெட்டிப்பட்டி வட்டாரப் பகுதியிலுள்ள ஏரிகளை பொதுப்பணித் துறையினா் கணக்கெடுப்பு நடத்தி தூா் வாரும் பணிகளை மேற்கொள்ள வேண்டும். அதன்படி சந்தப்பட்டி ஏரி, கெளாப்பாறை மொள்ளன் ஏரி, எச். அக்ரஹாரம் ஊராட்சிக்கு உள்பட்ட நெருப்பாண்டகுப்பம் ஏரி, நாய்க்கன் ஏரி, ஆட்டியானூா் ஏரி, அரூா் பெரிய ஏரியின் ராஜகால்வாய், மாவேரிப்பட்டி ஏரி, கொளகம்பட்டி ஏரி, மங்கானேரி உள்ளிட்ட ஏரிகளை தூா்வார மாவட்ட நிா்வாகம் நடவடிக்கை எடுக்க வேண்டும்.