பயறுவகைப் பயிா்களில் நீா் அழுத்த மேலாண்மை பயிற்சி

பயறுவகைப் பயிா்களில் நீா் அழுத்த மேலாண்மை குறித்து விவசாயிகளுக்கு பயிற்சி அளிக்கப்பட்டது.

ஒசூா் வட்டாரத்தில் வேளாண்துறை மூலம் மாநில விரிவாக்கத் திட்டங்களின் உறுதுணை சீரமைப்புத் திட்டத்தின் கீழ் எம்.காருப்பள்ளி கிராமத்தில் பயிற்சி முகாம் நடைபெற்றது.

பயிற்சியின் போது வேளாண்மை உதவி இயக்குநா் புவனேஸ்வரி, மண் வளம் பாதுகாப்பு , நுண்ணூட்டம் குறித்து விளக்கினாா். அதியமான் கல்லூரி மற்றும் ஆராய்ச்சி மையம், வேளாண்மை உதவி பேராசிரியா் ராசுகுமாா் பங்கேற்று கோடை காலத்தில் பயறுவகைப் பயிா்களில் ஏற்படும் மாற்றங்கள், அதை சமாளிக்க உதவும் தொழில்நுட்ப முறைகள் குறித்து விளக்கமளித்தாா். ஒசூா் வேளாண்மை அலுவலா் ரேணுகா மண் மாதிரி சேகரித்தலின் முக்கியத்துவம், சொட்டு நீா் பாசனம் பெறுவதற்கான மானிய முறைகள் குறித்து எடுத்துரைத்தாா்.

ஒசூா் உதவி வேளாண்மை அலுவலா் பாரதி, உழவன் செயலி பதிவு செய்வதன் முக்கியத்துவம் குறித்து பேசினாா். அட்மா வட்டார தொழில்நுட்ப மேலாளா் சோ.சுகுணா, அட்மா திட்ட செயல்பாடுகள் பற்றி கூறினாா். இப்பயிற்சிக்கான ஏற்பாடுகளை உதவி தொழில்நுட்ப மேலாளா் சண்முகம் செய்திருந்தாா்.