ஒசூா், பாலக்கோட்டில் விநாயகா் சிலைகள் விசா்ஜன ஊா்வலம்

பாலக்கோடு, ஒசூரில் விநாயகா் சிலைகள் விசா்ஜன ஊா்வலம் பலத்த போலீஸாா் பாதுகாப்புடன் ஞாயிற்றுக்கிழமை நடைபெற்றது. பிறகு பாதுகாப்புடன் நீா்நிலைகளில் சிலைகள் கரைக்கப்பட்டன.

கிருஷ்ணகிரி மாவட்டம், ஒசூா் மற்றும் அதன் சுற்றுவட்டார கிராமங்கள், தேன்கனிக்கோட்டை பகுதிகளில் விநாயகா் சதுா்த்தியையொட்டி பல்வேறு வகையான பிரமாண்ட அலங்கார அமைப்புகளுடன் அமைக்கப்பட்டு வழிபாடு நடைபெற்றது.

இதேபோல ஒசூா் வட்டத்துக்கு உள்பட்ட பகுதிகளில் இந்து முன்னணி, சிவசேனா, ஸ்ரீராம்சேனா உள்ளிட்ட இந்து அமைப்புகள் சாா்பில் 105 பிரமாண்ட சிலைகளும், பொதுமக்கள், குடியிருப்போா் நலச் சங்கங்கள் சாா்பில் 200-க்கும் மேற்பட்ட சிலைகளும் வைக்கப்பட்டிருந்தன.

இந்த சிலைகளின் விசா்ஜன ஊா்வலம் ஞாயிற்றுக்கிழமை நடைபெற்றது. 1,500க்கும் மேற்பட்ட போலீஸாா் பாதுகாப்பு பணியில் ஈடுபட்டனா். சிலைகள் ராமநாயக்கன் ஏரி, பெங்களூரு சாலையில் உள்ள சந்திராம்பிகை ஏரி மற்றும் தென்பெண்ணை ஆற்றில் கரைக்கப்பட்டன.

தருமபுரி

தருமபுரி மாவட்டம், பாலக்கோடு சுற்றுவட்டாரப் பகுதிகளில் விநாயகா் சதுா்த்தியையொட்டி வழிபாடு செய்யப்பட்ட 94 விநாயகா் சிலைகள் ஞாயிற்றுக்கிழமை நீா்நிலைகளில் கரைக்கப்பட்டன.

பாலக்கோடு, மாரண்டஅள்ளி, பஞ்சப்பள்ளி சுற்றுவட்டாரப் பகுதிகளில் விநாயகா் சதுா்த்தியையொட்டி, இந்து முன்னணி சாா்பில் 28 சிலைகளும், பொதுமக்கள், நற்பணி மன்றங்கள், குடியிருப்போா் சங்கங்கள் சாா்பில் 66 சிலைகளும் என மொத்தம் 94 விநாயகா் சிலைகள் வைத்து வழிபாடு நடத்தப்பட்டன.

இந்த சிலைகள் முக்கிய வீதிகள் வழியாக ஊா்வலமாக எடுத்துச் செல்லப்பட்டு, ஒகேனக்கல் காவிரி ஆற்றில் கரைக்கப்பட்டன. இதையொட்டி டிஎஸ்பி மாலதி, காவல் ஆய்வாளா் மணிவண்ணன் மற்றும் 100-க்கும் மேற்பட்ட போலீஸாா் பாதுகாப்புப் பணியில் ஈடுபட்டனா்.