மக்கள் குறைதீர்க்கும் கூட்டம்: ரூ.1.32 லட்சம் நலத்திட்ட உதவிகள் அளிப்பு

மக்கள் குறைதீர்க்கும் நாள் கூட்டத்தில் 40 பயனாளிகளுக்கு ரூ.1.32 லட்சம் நலத்திட்ட உதவிகள் அளிக்கப்பட்டன.
 நாமக்கல் மாவட்ட ஆட்சியர் அலுவலக கூட்டரங்கில் மக்கள் குறைதீர்க்கும் நாள் கூட்டம் மாவட்ட ஆட்சியர் மு.ஆசியா மரியம் தலைமையில் திங்கள்கிழமை நடைபெற்றது.
 இக்கூட்டத்தில், பொதுமக்கள் பல்வேறு கோரிக்கைகள் குறித்து மொத்தம் 287 மனுக்களை ஆட்சியரிடம் வழங்கினர். இந்த மனுக்களைப் பெற்று கொண்ட அவர், உரிய அலுவலர்களிடம் வழங்கி அவற்றின் மீது துரித நடவடிக்கை மேற்கொண்டு தகுதியான நபர்களுக்கு நலத்திட்ட உதவிகளை வழங்க உத்தரவிட்டார்.
 இக்கூட்டத்தில், மாவட்ட பிற்படுத்தப்பட்டோர் மற்றும் சிறுபான்மையினர் நலத்துறை, மாற்றுத் திறனாளிகள் நலத்துறை சார்பில் 40 பயனாளிகளுக்கு ரூ.1,32,054 மதிப்பிலான நலத்திட்ட உதவிகள் மற்றும் மாற்றுத் திறனாளிகளுக்கான தேசிய அடையாள அட்டைகளை ஆட்சியர் வழங்கினார்.
 கூட்டத்தில் மாவட்ட வருவாய் அலுவலர் கு.பழனிசாமி, சமூக பாதுகாப்பு திட்ட தனித்துணை ஆட்சியர் எம்.துரை, மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலர் எம்.கண்ணன், மாவட்ட மாற்றுத் திறனாளிகள் நல அலுவலர் கே.சுப்பிரமணி உள்ளிட்டோர் பங்கேற்றனர்.