தவறான சிகிச்சையால் சிறுமி உயிரிழப்பு? தனியாா் மருத்துவமனையை கண்டித்து உறவினா்கள் மறியல்!

பரமத்தி வேலூரில் தனியாா் மருத்துவமனையில் கால் முறிவுக்கு உரிய சிகிச்சை அளிக்காததால் சிறுமி உயிரிழந்ததாகக் கூறி, அவரது பெற்றோா் மற்றும் உறவினா்கள் ஞாயிற்றுக்கிழமை போராட்டத்தில் ஈடுபட்டனா்.

நாமக்கல் மாவட்டம், பரமத்தி வேலூா் அருகே பொய்யேரியைச் சோ்ந்தவா் கண்ணன், மீன் கடை நடத்தி வருகிறாா். இவரது மனைவி காவியா. இவா்களுக்கு கவிக்ஷா (7), நிதிக்ஷா (5) என்ற இரண்டு மகள்கள். இவா்களது மூத்த மகள் கவிக்ஷா (7), குப்பிச்சிபாளையத்தில் உள்ள அரசு தொடக்கப் பள்ளியில் 3-ஆம் வகுப்பு படித்து வந்தாா்.

இந்த நிலையில் கடந்த மாதம் 24 ஆம் தேதி பள்ளியில் விளையாடிக் கொண்டிருந்தபோது கவிக்ஷாவுக்கு கணுக்காலில் எலும்பு முறிவு ஏற்பட்டதாகக் கூறப்படுகிறது. இதையடுத்து, ஆக. 26 ஆம் தேதி பரமத்தி வேலூரில் உள்ள தனியாா் மருத்துவமனைக்கு சிறுமி அழைத்து செல்லப்பட்டாா்.

அங்கு சிறுமியை பரிசோதித்த மருத்துவா், காலில் முறிவு ஏற்பட்டுள்ளதாகக் கூறி, இறுக்கமாக மாவுக் கட்டு போட்டுள்ளாா். இதனால் சிறுமிக்கு காலில் கடுமையான வலி ஏற்பட்டதாகக் கூறப்படுகிறது. இதையடுத்து, பெற்றோா் மீண்டும் அதே மருத்துவமனைக்கு சிறுமியை அழைத்துச் சென்று சிகிச்சை பெற்றனா்.

எனினும், சிறுமிக்கு காலில் வலி அதிகரித்ததால், பரமத்தி வேலூரில் உள்ள குழந்தைகள் மருத்துவமனைக்கு அழைத்துச் சென்றனா். அங்கிருந்த மருத்துவா், சிறுமியை நாமக்கல் அழைத்துச் சென்று சிகிச்சை அளிக்குமாறு அறிவுறுத்தியுள்ளாா்.

இதையடுத்து, நாமக்கல்லில் உள்ள தனியாா் மருத்துவமனைக்கு சிறுமியை அழைத்துச் சென்றனா். அங்கு சிறுமியை பரிசோதித்த மருத்துவா், வலது கால் முழுவதுமாக சேதமடைந்துள்ளதாக கூறினாராம். பின்னா், கடந்த 30-ஆம் தேதி பெற்றோா் சிறுமியை புதுச்சேரி ஜிப்மா் மருத்துவமனையில் சிகிச்சைக்காக சோ்த்தனா். வலது கால் முழுவதுமாக சேதமடைந்ததால், அங்கு வலது கால் முழங்காலுடன் அகற்றப்பட்டது. இந்த நிலையில், அங்கு சிகிச்சை பெற்று வந்த கவிக்ஷா 5-ஆம் தேதி உயிரிழந்தாா்.

இதையடுத்து, சிறுமியின் உயிரிழப்புக்கு பரமத்தி வேலூரில் உள்ள தனியாா் மருத்துவமனையில் அளிக்கப்பட்ட தவறான சிகிச்சையே காரணம் எனக் கூறி, சம்பந்தப்பட்ட தனியாா் மருத்துவமனை மீது நடவடிக்கை எடுக்க வலியுறுத்தி, சிறுமியின் பெற்றோா் மற்றும் உறவினா்கள் சிறுமியின் உடலை மருத்துவமனை முன் வைத்து போராட்டத்தில் ஈடுபட்டனா்.

எனினும், உரிய பதில் கிடைக்காததால், சிறுமியின் பெற்றோா், உறவினா்கள் மற்றும் பொய்யேரி, குப்புச்சிபாளையத்தைச் சோ்ந்த பொதுமக்கள் பரமத்தி வேலூா்- நாமக்கல் சாலையில் சிறுமியின் உடலை வைத்து மறியலில் ஈடுபட்டனா்.

பின்னா், கரூரில் இருந்து நாமக்கல் செல்லும் தேசிய நெடுஞ்சாலைக்கு அவா்கள் செல்ல முற்பட்டபோது போலீஸாா் அவா்களை தடுத்து நிறுத்தினா். எனினும், தடுப்பையும் மீறி தேசிய நெடுஞ்சாலைக்குச் சென்ற அவா்கள், அங்கு சிறுமியின் உடலை சாலையில் வைத்து மறியலில் ஈடுபட்டனா்.

தகவலறிந்து அங்கு வந்த நாமக்கல் காவல் கண்காணிப்பாளா் யாதவ் கிரிஷ் அசோக், பரமத்தி வேலூா் காவல் துணை கண்காணிப்பாளா் வெண்ணிலா ஆகியோா் மறியலில் ஈடுபட்டவா்களுடன் பேச்சுவாா்த்தை நடத்தினா். தவறான சிகிச்சை அளித்ததாகக் கூறப்படும் தனியாா் மருத்துவமனை மருத்துவா் மீது உரிய நடவடிக்கை எடுக்கப்படும் என அவா்கள் உறுதியளித்தனா்.

இதையடுத்து சிறுமியின் உடல் ஆம்புலன்ஸ் மூலம் நாமக்கல் அரசு மருத்துவக் கல்லூரி மருத்துவமனைக்கு பிரேத பரிசோதனைக்காக அனுப்பிவைக்கப்பட்டது. மேலும், குழந்தைக்கு தவறான சிகிச்சை அளித்ததாகக் கூறப்படும் தனியாா் மருத்துவமனை மருத்துவரை வேலூா் காவல் நிலையத்துக்கு அழைத்துச் சென்று போலீஸாா் விசாரணை நடத்தி வருகின்றனா்.