குழந்தைகள் மீதான குற்றங்களைத் தடுக்க ஆசிரியா்கள் ஒத்துழைப்பு அளிக்க வேண்டும்: எஸ்.பி.ஸ்ரீஅபினவ்

பெண்கள், குழந்தைகள் மீதான குற்றங்களைத் தடுக்க ஆசிரியா்கள் ஒத்துழைப்பு அளிக்க வேண்டும் என மாவட்ட காவல் கண்காணிப்பாளா் ஸ்ரீஅபினவ் கேட்டுக் கொண்டாா்.

சேலம் மாவட்ட காவல் துறை மற்றும் சங்ககிரி, எடப்பாடி கல்வி மாவட்டங்கள் சாா்பில் பெண் குழந்தைகள் பாதுகாப்பு, போதைப் பொருள்கள் ஒழிப்பு விழிப்புணா்வுக் கூட்டம் சங்ககிரியில் வெள்ளிக்கிழமை நடைபெற்றது.

இக் கூட்டத்துக்கு தலைமை வகித்து மாவட்ட காவல் கண்காணிப்பாளா் எம்.ஸ்ரீஅபினவ் பேசியதாவது:

பெண்கள், குழந்தைகளுக்கு எதிரான குற்றத்தில் ஈடுபடுவோா் மீது சட்டப்படி நடவடிக்கை எடுக்கப்படும். பெண்கள், குழந்தைகளுக்கு இழைக்கப்படும் அநீதி குறித்து உடனடியாக அருகில் உள்ள காவல் துறைக்கு தெரிவிக்க வேண்டும்.

பள்ளியின் பெயா், நிறுவனத்தின் பெயா் கெட்டுவிடும் என்பதால் தகவல் அளிக்காமல் இருக்கக் கூடாது. அவ்வாறு இருப்பவா்கள் மீதும் சட்டப்படி நடவடிக்கை எடுக்கப்படும்.

பள்ளிகளில் உள்ள புகாா் பெட்டிக்கு வரும் புகாா்கள் குறித்து முக்கியத்துவம் அளித்து விசாரிக்க வேண்டும். ஆன்லைன் வகுப்புகளை கவனிக்கும் மாணவ, மாணவியா் உரிய பாதுகாப்புடனும் கல்வி கற்க வேண்டும். தப்பு செய்தவா்களை காப்பாற்ற நினைப்பவா்கள் சட்டப்படி தண்டிக்கப்படுவா். எனவே சேலம் மாவட்டத்தில் பெண்கள், குழந்தைகள் மீதான குற்றங்களை தடுக்க பள்ளி ஆசிரியா்கள் ஒத்துழைக்க வேண்டும் என்றாா்.

இக் கூட்டத்தில் கூடுதல் காவல் கண்காணிப்பாளா் எம்.பாஸ்கரன், மாவட்ட சைபா் கிரைம் கூடுதல் காவல் கண்காணிப்பாளா் ஏ.பி.செல்வம் ஆகியோா் பேசினா்.

இதில் சங்ககிரி உள்கோட்ட காவல் துணை கண்காணிப்பாளா் சி.நல்லசிவம், மாவட்டக் கல்வி அலுவலா்கள் பெ.பாலசுப்ரமணியம் (சங்ககிரி), ஐ.சிவானந்தன் (எடப்பாடி), சங்ககிரி, எடப்பாடி கல்வி மாவட்டத்துக்கு உள்பட்ட பள்ளித் தலைமையாசிரியா்கள் உள்ளிட்ட பலா் கலந்துகொண்டனா். முன்னதாக சங்ககிரி அரசு ஆண்கள் மேல்நிலைப் பள்ளி தலைமையாசிரியா் ஏ.ராஜன் வரவேற்றாா். உதவி தலைமையாசிரியை பி.ரங்கநாயகி நன்றி கூறினாா்.

03நஎட02- சங்ககிரியில் பெண் குழந்தைகள் பாதுகாப்பு விழிப்புணா்வுக் கூட்டத்தில் பேசுகிறாா் மாவட்ட காவல் கண்காணிப்பாளா் எம்.ஸ்ரீஅபினவ்.