வியாபாரத்துக்கு இடம் ஒதுக்க சாலையோர வியாபாரிகள் கோரிக்கை

வாழப்பாடியில் சாலையோரத்தில் கடைகள் வைப்பதற்கு அனுமதி மறுக்கப்படுவதால், சாலையோர வியாபாரிகள் இடம் ஒதுக்க வேண்டுமென வாழப்பாடி காவல் நிலையத்தில் கோரிக்கை விடுத்தனா்.

வாழப்பாடி பேரூராட்சியில் கடலூா் பிரதான சாலையில், பருத்தி மண்டியில் இருந்து பேளூா் பிரிவு சாலை வரை சாலையோர சிறு வியாபாரிகள் விவசாய விளைபொருள்களை விற்பனை செய்து வந்தனா். இப்பகுதியில் மாலை நேரத்தில், சிற்றுண்டி வியாபாரம் நடைபெற்றது.

இந்நிலையில், கடந்த செப்டம்பா் 29-ஆம் தேதி, வருமுன் காப்போம் மருத்துவ முகாம் திட்டத்தை தொடங்கி வைக்க முதல்வா் மு.க.ஸ்டாலின் வாழப்பாடிக்கு வந்து சென்றதையொட்டி, கடலுாா் சாலையின் இருபுறமும் ஆக்கிரமிப்புகள் அகற்றப்பட்டன.

சாலையோர வியாபாரிகளின் சிறு கடைகளையும் அதிகாரிகள் அப்புறப்படுத்தினா். அந்த இடங்களில் மீண்டும் சாலையோர வியாபாரிகள் கடைகள் வைக்க போலீஸாா் அனுமதி அளிக்கவில்லை.

இதனைத்தொடா்ந்து, முத்தம்பட்டி ரயில்வே கேட்டில் இருந்து அரசு மருத்துவமனை வரை கடலுாா் சாலையின் இருபுறமும் இருந்த ஆக்கிரமிப்புகளை வருவாய்த் துறை, காவல் துறையுடன் இணைந்து தேசிய நெடுஞ்சாலைத் துறையினா் அகற்றினா்.

இந்நிலையில், வாழ்வாதாரத்தை இழந்துள்ள சாலையோர வியாபாரிகள், தமிழக வாழ்வுரிமை கட்சி மாநில நிா்வாகி ராஜலிங்கம் தலைமையில், வாழப்பாடி காவல் நிலையத்திற்கு திரண்டு சென்று, சாலையோரத்தில் சிறு கடைகள் வைத்து பிழைப்பு நடத்துவற்கு அனுமதிக்க வேண்டும் அல்லது வேறு இடம் ஒதுக்கிக் கொடுக்க உடனடியாக நடவடிக்கை எடுக்க வேண்டுமென, வெள்ளிக்கிழமை கோரிக்கை விடுத்தனா். பிற துறை அதிகாரிகளுடன் கலந்தாய்வு செய்து, உரிய நடவடிக்கை எடுப்பதாக, வாழப்பாடி காவல் ஆய்வாளா் உமாசங்கா் தலைமையிலான போலீஸாா் உறுதியளித்து, சாலையோர வியாபாரிகளை சமாதானம் செய்து அனுப்பி வைத்தனா்.