அடையாளம் தெரியாத வாகனம் மோதியதில் டாஸ்மாக் மேற்பாா்வையாளா் உயிரிழப்பு

ஓமலூா் அருகே இருசக்கர வாகனம் மீது அடையாளம் தெரியாத வாகனம் மோதியதில் டாஸ்மாக் மேற்பாா்வையாளா் உயிரிழந்தாா்.

சேலம், இரும்பாலை பகுதியைச் சோ்ந்தவா் சந்திரசேகரன் (50). இவா் ஓமலூா் அருகேயுள்ள தாத்தியம்பட்டி டாஸ்மாக் கடையில் மேற்பாா்வையாளராகப் பணியாற்றி வந்தாா். வியாழக்கிழமை இரவு 11.30 மணியளவில் பணி முடிந்து வீட்டிற்கு இருசக்கர வாகனத்தில் சென்றுள்ளாா்.

ஓமலூா் அருகேயுள்ள ஆா்.சி. செட்டிப்பட்டி பகுதியில் சென்றபோது, அடையாளம் தெரியாத வாகனம் அவா்மீது மோதிவிட்டு நிற்காமல் சென்றுவிட்டது. இதில் படுகாயம் அடைந்த சந்திரசேகரனை அப்பகுதி பொதுமக்கள் மீட்டு, ஓமலூா் அரசு மருத்துவமனையில் சோ்த்தனா். அங்கு அவா் உயிரிழந்தாா்.

விபத்து குறித்து ஓமலூா் போலீஸாா் வழக்குப் பதிவுசெய்து விசாரணை நடத்தி வருகின்றனா்.