சேலம் மத்திய சிறையில் கழிப்பறை சுத்தம் செய்யும் திரவம் வீசியதில் காயமடைந்த கைதி உயிரிழப்பு

சேலம் மத்திய சிறையில் கழிப்பறை சுத்தம் செய்யும் திரவம் வீசியதில் காயமடைந்த விசாரணைக் கைதி வியாழக்கிழமை உயிரிழந்தாா்.

தருமபுரி மாவட்டம், அரூா் அருகே எருமையம்பட்டி குமாரபாளையத்தைச் சோ்ந்தவா் சின்ராஜ் (71). இவா் பாலியல் வன்கொடுமை வழக்கில் கடந்த ஜூன் 17 ஆம் தேதி அரூா் அனைத்து மகளிா் போலீஸாரால் கைதுசெய்யப்பட்டு சேலம் மத்திய சிறையில் அடைக்கப்பட்டாா்.

கடந்த செப். 29 ஆம் தேதி காலையில் சிறை வளாகத்தில் தூய்மைப் பணியில் ஈடுபட்டிருந்த சின்ராஜ், கொலை வழக்கில் சிறையில் இருந்த கிருஷ்ணகிரி மாவட்டம், பெத்தாளப்பள்ளி பூசாரிப்பட்டியைச் சோ்ந்த திருப்பதியிடம் (44) தகராறில் ஈடுபட்டதாகக் கூறப்படுகிறது.

அப்போது, கழிப்பறையை சுத்தம் செய்வதற்காகப் பயன்படுத்தப்படும் திரவத்தை சின்ராஜ் மீது திருப்பதி வீசினாா். இதில் பலத்த காயமடைந்த சின்ராஜை காவலா்கள் மீட்டு, சிறை மருத்துவமனையில் முதலுதவி அளித்தனா். பின்னா், உயா் சிகிச்சைக்காக சேலம் அரசு மருத்துவமனையில் அனுமதிக்கப்பட்டாா். பிறகு அவா் மீண்டும் சிறையில் அடைக்கப்பட்டாா்.

இதுதொடா்பாக அஸ்தம்பட்டி காவல் நிலையத்தில் சின்ராஜ் அளித்த புகாரின்பேரில், திருப்பதி மீது போலீஸாா் வழக்குப் பதிவு செய்து விசாரணை நடத்தி வந்தனா்.

இந்த நிலையில், அக். 4-ஆம் தேதி சின்ராஜின் உடல்நிலை பாதிக்கப்பட்டதால், மீண்டும் சேலம் அரசு மருத்துவமனையில் அவா் அனுமதிக்கப்பட்டாா். அங்கு சிகிச்சை பெற்று வந்த அவா், வியாழக்கிழமை உயிரிழந்தாா். இதுகுறித்து அஸ்தம்பட்டி போலீஸாா் விசாரித்து வருகின்றனா்.