சிங்கம்புணரி விரிவாக்கக் கால்வாய்க்கு தண்ணீர் திறக்க விவசாயிகள் கோரிக்கை 

பெரியாறு பாசனத் திட்டத்தில் சிங்கம்புணரி விரிவாக்கக் கால்வாயில்  தண்ணீர் திறக்குமாறு விவசாயிகள் கோரிக்கை விடுத்துள்ளனர்.
 இதுதொடர்பாக மேலூர் வட்டம் கருங்காலக்குடி, வஞ்சிநகரம், கச்சிராயன்பட்டி உள்ளிட்ட கிராமங்களைச் சேர்ந்த விவசாயிகள் மாவட்ட ஆட்சியரிடம் கோரிக்கை மனு அளித்தனர். அதன் விவரம்:  பெரியாறு பாசனத் திட்டத்தில் சிங்கம்புணரி விரிவாக்கக் கால்வாய் புலிப்பட்டி கிராமத்தில் இருந்து சிங்கம்புணரி வரை சுமார் 4 ஆயிரம் ஏக்கரில் விவசாயம் செய்யப்படுகிறது.  
இப்பகுதியின் ஒரே வாழ்வாதாரமாக இருப்பது விவசாயம் மட்டுமே.  கடந்த 5 ஆண்டுகளுக்கும் மேலாக விரிவாக்கக் கால்வாயில் தண்ணீர் வராததாலும், போதிய மழை இல்லாததாலும் இப்பகுதி விவசாயிகள் குடிநீருக்குக் கூட பெரிதும் பாதிக்கப்பட்டுள்ளனர். 
தற்போது முல்லைப் பெரியாறு அணை மற்றும் வைகை அணைகளில் இருந்து பாசனத்துக்கு தண்ணீர் திறக்கப்பட்டுள்ளது.  
ஆகவே, சிங்கம்புணரி விரிவாக்கக் கால்வாய் பகுதிகளுக்கு விரைவில் முழு அளவில் தண்ணீர் திறக்க வேண்டும் எனக் கோரிக்கை விடுத்துள்ளனர்.