ராஜீவ் காந்தி கொலை வழக்கு கைதி ரவிச்சந்திரன் முதல்வருக்கு கடிதம்

முன்னாள் பிரதமர் ராஜீவ்காந்தியின் கொலை வழக்கில் கைதாகி மதுரை சிறையில் வைக்கப்பட்டிருக்கும் ரவிச்சந்திரன், தங்களது விடுதலைக்காக தீர்மானம் நிறைவேற்றிய தமிழக முதல்வருக்கு நன்றி தெரிவித்து கடிதம் எழுதியுள்ளார்.
ராஜீவ்காந்தி கொலை வழக்கில் தண்டனை பெற்றவர்களை விடுதலை செய்வது குறித்து தமிழக அரசு முடிவெடுத்து, ஆளுநருக்கு பரிந்துரைக்கலாம் என உச்சநீதிமன்றம் உத்தரவிட்டது.  அதன்படி தமிழக முதல்வர் எடப்பாடி பழனிசாமி தலைமையில் அண்மையில் நடைபெற்ற அமைச்சரவைக் கூட்டத்தில், ராஜீவ் காந்தி கொலை வழக்கில் தண்டனை பெற்றவர்களை 
விடுதலை செய்ய தீர்மானம் 
நிறைவேற்றி, அதை தமிழக ஆளுநர் பன்வாரிலால் புரோஹித்துக்கு அனுப்பி வைக்கப்பட்டுள்ளது.
 இந்நிலையில், தங்களது விடுதலைக்காக அமைச்சரவைக் கூட்டத்தில் தீர்மானம் நிறைவேற்றியமைக்காக, தமிழக முதல்வர் எடப்பாடி கே.பழனிசாமிக்கு நன்றி தெரிவித்து, மதுரை சிறையிலிருக்கும் ரவிச்சந்திரன் கடிதம் எழுதியுள்ளார். அவரது கடிதம் அதிகாரிகளின் பரிசீலனைக்கு உள்படுத்தப்பட்டு புதன்கிழமை தமிழக முதல்வருக்கு அனுப்பி வைக்கப்பட்டுள்ளதாக சிறைத்துறை வட்டாரங்கள் தெரிவித்தன.