தமிழக கடலோரப் பகுதிகளில் ஊசி வலைகளை  பயன்படுத்தி மீன்பிடிக்கத் தடை கோரி மனு: அரசிடம் விளக்கம் பெற்றுத் தெரிவிக்க உத்தரவு

தமிழக கடலோரப் பகுதிகளில் ஊசி வலைகளைப் பயன்படுத்தி மீன்பிடிக்கத் தடை கோரி தாக்கல் செய்யப்பட்ட மனு தொடர்பாக அரசிடம் விளக்கம் பெற்றுத் தெரிவிக்க அரசு வழக்குரைஞருக்குச் சென்னை உயர்நீதிமன்ற மதுரைக் கிளை புதன்கிழமை உத்தரவிட்டது.
இதுதொடர்பாக தனுஷ்கோடி பாரம்பரிய மீனவர் நலச்சங்க செயலர் பி.சி.அமுதன், சென்னை உயர்நீதிமன்ற மதுரைக் கிளையில் தாக்கல் செய்த மனு:
கடல் வளத்துக்கும், சுற்றுச்சூழலுக்கும் பாதிப்பு இல்லாமல் சுருக்குமடி வலையை பயன்படுத்தி மீன்பிடி தொழில் செய்து வருகிறோம். இப்பகுதியில் உள்ள ஒருசில மீனவர்கள் தடை செய்யபட்ட ஊசி வலைகளை பயன்படுத்தி மீன்பிடி தொழில் செய்து வருகின்றனர். ஊசி வலைகள் கடலில் 2.5 கி.மீ., தூரம் வரை செல்வதால் ஆழ்கடலில் பாதிப்புகள் ஏற்படும். இந்த ஊசி வலைகளில் பிடிபடும் நட்சத்திர மீன் மற்றும் கடற்பாசிகள் போன்றவை வர்த்தகரீதியில் அதிகப்படியான விலைக்கு விற்கப்படுகிறது. தமிழக அரசு 2000 ஆம் ஆண்டு மார்ச் 25 இல் ஒரு அறிவிப்பை வெளியிட்டது. அதில் "ஊசி வலைகளை பயன்படுத்தி, மீன் பிடிப்பதால் கடல் உயிரினங்கள், விலங்குகள், அரிய வகை மீன்களுக்கு பாதிப்பு ஏற்படுகின்றன. இதனால் கடல் உயிரினங்கள் முற்றிலும் அழிந்து வருகின்றன. ஐக்கிய நாடுகள் சபை ஊசி வலைகளை பயன்படுத்த தடைவிதித்துள்ளது என குறிப்பிடப்பட்டிருந்தது. எனவே, தமிழக கடலோர பகுதிகளில் ஊசி வலைகளை பயன்படுத்தி மீன்பிடிக்க தடைவிதித்து உத்தரவிட வேண்டும் என மனுவில் குறிப்பிட்டிருந்தார்.
 இந்த மனு நீதிபதிகள் எம்.எம்.சுந்தரேஷ், என்.சதீஷ் குமார் ஆகியோர் அடங்கிய அமர்வு முன்பு புதன்கிழமை விசாரணைக்கு வந்தது. மனுவை விசாரித்த நீதிபதிகள், இதுதொடர்பாக தமிழக அரசிடம் உரிய விளக்கம் பெற்றுத் தெரிவிக்க அரசு வழக்குரைஞருக்கு உத்தரவிட்டு விசாரணையை வரும் 17 ஆம் தேதிக்கு ஒத்திவைத்தனர்.