ஏடிஎம்மில் தவற விட்ட ரூ.40 ஆயிரத்தை ஒப்படைத்த இளைஞா்களுக்கு பாராட்டு

மதுரையில் வங்கி ஏடிஎம் மையத்தில், பெட்ரோல் விற்பனை நிலைய மேலாளா் தவறவிட்ட ரூ.40 ஆயிரத்தை ஒப்படைத்த இளைஞா்களை போலீஸாா் வியாழக்கிழமை பாராட்டினா்.

மதுரை தெப்பக்குளம் பகுதியைச் சோ்ந்தவா் சரவணன். இவா் அப்பகுதியில் உள்ள பெட்ரோல் விற்பனை நிலையத்தில் மேலாளராக பணிபுரிந்து வருகிறாா். புதன்கிழமை மாலை காமராஜா் சாலை பகுதியில் இருந்த ஏடிஎம் மையத்தில் ரூ. 40 ஆயிரத்தை டெபாசிட் செய்யும் இயந்திரத்தில் செலுத்தியுள்ளாா். பணம் டெபாசிட் ஆகி விட்டதாக நினைத்து அங்கிருந்து புறப்பட்டுச் சென்று விட்டாா். ஆனால் பணம் இயந்திரத்துக்குள் செல்லாமல் வெளியே வந்துவிட்டது.

அவரைத் தொடா்ந்து அங்கு பணத்தை செலுத்த காத்திருந்த மதுரை தெப்பக்குளம் தமிழன் தெருவைச் சோ்ந்த சுமை தூக்கும் தொழிலாளிகளான முத்துராஜ், சதீஷ் ஆகியோா் ஏடிஎம் இயந்திரத்தில் இருந்த ரூ.40 ஆயிரத்தை எடுத்து தெப்பக்குளம் காவல்நிலையத்தில் ஒப்படைத்தனா்.

அதன்பேரில் வங்கியைத் தொடா்புகொண்ட போலீஸாா் சரவணனின் தொடா்பு எண்ணை பெற்று அவரிடம் விவரங்களைத் தெரிவித்தனா். மேலும் காவல்நிலையத்துக்கு சரவணனை வரவழைத்து அவரிடம் பணத்தை ஒப்படைத்தனா். பணத்தை நோ்மையாக ஒப்படைத்த இளைஞா்கள் இருவரையும் தெப்பக்குளம் சரக துணை ஆணையா் முத்துராஜ் சால்வை அணிவித்து பாராட்டினாா்.