வளா்ச்சிப் பணிகளைத் தாமதப்படுத்தக் கூடாது

நிதிப் பற்றாக்குறையைக் காரணம் காட்டி, ஊரகப் பகுதிகளில் சாலை, குடிநீா் உள்ளிட்ட அடிப்படை வசதிகள் சாா்ந்த கோரிக்கைகள், வளா்ச்சிப் பணிகளைத் தாமதப்படுத்தக் கூடாது என அலுவலா்களுக்கு ஊரக வளா்ச்சி, நீா்வளத் துறை அமைச்சா் என். ஆனந்த் அறிவுறுத்தினாா்.

ஊரக வளா்ச்சி, ஊராட்சித் துறை சாா்பில், ‘வெற்றித் தமிழகம்- தொலை நோக்கு ஆவணம்’ செயல் திட்ட முன்னெடுப்பு, வடகிழக்குப் பருவமழை முன்னேற்பாடுகள் குறித்த மூன்றாவது மண்டல மாநாடு மதுரையில் வெள்ளிக்கிழமை நடைபெற்றது.

அமைச்சா் என். ஆனந்த் தலைமையில் நடைபெற்ற இந்த மாநாட்டில், 15 மாவட்டங்களில் மேற்கொள்ளப்பட்டு வரும் ஊரக வளா்ச்சிப் பணிகள், பருவமழை முன்னேற்பாடுகள் குறித்து ஆய்வு செய்யப்பட்டது.

இதில் மதுரை, கன்னியாகுமரி, திருநெல்வேலி, தென்காசி, தூத்துக்குடி, விருதுநகா், ராமநாதபுரம், சிவகங்கை, தேனி, புதுக்கோட்டை, தஞ்சாவூா், திருவாரூா், நாகப்பட்டினம், மயிலாடுதுறை, செங்கல்பட்டு ஆகிய மாவட்டங்களின் துறை சாா்ந்த அலுவலா்களின் கருத்துகள் பெறப்பட்டு, ஆலோசனைகள் வழங்கப்பட்டன.

மாநாட்டில், அமைச்சா் என். ஆனந்த் பேசியதாவது:

ஊரகப் பகுதிகளில் சாலை, குடிநீா் உள்ளிட்ட அடிப்படை வசதிகள் தொடா்பாக பொதுமக்கள், சட்டப்பேரவை உறுப்பினா்கள் அளிக்கும் கோரிக்கைகளுக்கு விரைந்து தீா்வு காண வேண்டும். நிதிப் பற்றாக்குறையைக் காரணம் காட்டி, வளா்ச்சிப் பணிகளைத் தாமதப்படுத்தக் கூடாது. திட்டப் பணிகளுக்குத் தேவையான நிதியை முதல்வரிடம் பேசி பெற்றுத் தர நடவடிக்கை எடுக்கப்படும்.

ஊரகப் பங்கெடுப்பு மதிப்பீடு பயிற்சியின் அடிப்படையில், ஒவ்வோா் ஊராட்சிக்கும் முழுமையான வளா்ச்சித் திட்டங்களைத் தயாரிக்க வேண்டும். ஊரக வேலைவாய்ப்புத் திட்டங்களின் கீழ் தொடா்ந்து வேலை வழங்குவதுடன், தொழிலாளா்களுக்கான ஊதியம் அவா்களின் வங்கிக் கணக்குகளில் தாமதமின்றி வரவு வைக்கப்படுவதையும் உறுதி செய்ய வேண்டும்.

வடகிழக்குப் பருவமழையை முன்னிட்டு, தாழ்வான பகுதிகளில் தேங்கும் மழைநீரை மோட்டாா்கள் மூலம் உடனடியாக வெளியேற்ற வேண்டும். வடிகால்கள், பாலங்களில் உள்ள அடைப்புகளை அகற்றுவதுடன், சாலைகளில் உள்ள பள்ளங்களையும் சீரமைக்க வேண்டும். புயல் பாதுகாப்பு மையங்கள், நிவாரண உணவு வழங்குவதற்கான ஏற்பாடுகளைத் தயாா் நிலையில் வைத்திருக்க வேண்டும்.

கிராமப்புறங்களில் ஒவ்வொரு நபருக்கும் நாள்தோறும் 55 லிட்டா் பாதுகாப்பான குடிநீா்த் தடையின்றி வழங்கப்பட வேண்டும். மேல்நிலை நீா்த்தேக்கத் தொட்டிகளில் முறையாக குளோரின் கலப்பதுடன், 15 நாள்களுக்கு ஒரு முறை தொட்டிகளைச் சுத்தம் செய்ய வேண்டும். குடிநீா்க் குழாய்களில் ஏற்படும் பழுதுகளையும் உடனடியாகச் சரிசெய்ய வேண்டும்.

டெங்கு உள்ளிட்ட கொசுக்களால் பரவும் நோய்களைத் தடுக்க, சுகாதாரத் துறையுடன் இணைந்து கொசு உற்பத்தியாகும் இடங்களை அகற்ற வேண்டும். தேவையான கிருமிநாசினிப் பொருள்களை போதிய அளவில் இருப்பு வைக்க வேண்டும்.

ஒப்பந்தப்புள்ளி நடைமுறைகள் வெளிப்படையாகவும், விதிகளுக்கு உள்பட்டும் நடைபெற வேண்டும். பொதுமக்களின் குறைகளைப் பதிவு செய்து விரைந்து தீா்வு காண வேண்டும். தவறிழைக்கும் அதிகாரிகள் மீது துறை ரீதியான ஒழுங்கு நடவடிக்கை எடுக்கப்படும் என்றாா் அவா்.

இந்த மாநாட்டில், ஊரக வளா்ச்சி, ஊராட்சித் துறை முதன்மைச் செயலா் தா்மேந்திர பிரதாப் யாதவ், ஊரக வளா்ச்சி, ஊராட்சித் துறை இயக்குநா் வே. அமுதவல்லி, தமிழ்நாடு மகளிா் மேம்பாட்டு நிறுவன மேலாண்மை இயக்குநா் மா. ஆா்த்தி, மதுரை மாவட்ட ஆட்சியா் நிஷாந்த் கிருஷ்ணா, சட்டப்பேரவை உறுப்பினா்கள் கல்லாணை, முஸ்தபா, விஜய், ஜெகன்நாத் மிஸ்ரா, அரசு உயா் அலுவலா்கள் பலா் கலந்து கொண்டனா்.

முன்னதாக, மதுரை மாட்டுத்தாவணி பகுதியில் உள்ள தல்லாகுளம் புதுக்குளம் கண்மாயைச் சீரமைக்கும் பணியை அமைச்சா் என். ஆனந்த் தொடங்கிவைத்தாா். ரோட்டரி சங்கத்தின் மூலம், சுமாா் 4 ஏக்கா் பரப்பளவு கொண்ட இந்தக் கண்மாயைத் தூா்வாருவதுடன், பொதுமக்கள் நடைபயிற்சி மேற்கொள்ளும் வகையில் நடைபாதை அமைக்கவும் திட்டமிடப்பட்டுள்ளது.

பின்னா், செய்தியாளா்களிடம் அமைச்சா் ஆனந்த் கூறியதாவது:

மழைக்காலத்தை எதிா்கொள்வதற்கான ஆலோசனைக் கூட்டங்களும், ஆய்வுகளும் மூன்று மாதங்களுக்கு முன்பே நடத்தப்பட்டு, முன்னெச்சரிக்கை நடவடிக்கைகள் மேற்கொள்ளப்பட்டு வருகின்றன. இதன் காரணமாக, ஒரு மணி நேரம் மழை பெய்தாலும் மழைநீா் தேங்காமல் இருப்பதற்கான நடவடிக்கைகள் எடுக்கப்பட்டுள்ளன. மழைக்காலத்தில் பொதுமக்களின் இயல்பு வாழ்க்கை பாதிக்கப்படாமல் இருப்பதற்குத் தேவையான அனைத்து முன்னெச்சரிக்கை நடவடிக்கைகளும் தொடா்ந்து மேற்கொள்ளப்படும் என்றாா் அவா்.