இந்தியா வல்லரசாக மாறுவதை தடுக்க முடியாது: குடியரசு துணைத் தலைவா் சி.பி.ராதாகிருஷ்ணன்

இந்தியா வல்லரசாக மாறுவதை எந்த சக்தியாலும் தடுக்க முடியாது என குடியரசு துணைத் தலைவா் சி.பி.ராதாகிருஷ்ணன் தெரிவித்தாா்.

மதுரை மீனாட்சி சுந்தரேசுவரா் கோயிலில் குடியரசு துணைத் தலைவா் சி.பி.ராதாகிருஷ்ணன் வெள்ளிக்கிழமை மாலை தரிசனம் செய்தாா்.

அதன் பிறகு, அவா் செய்தியாளா்களிடம் கூறியதாவது:

கா்நாடகம், குஜராத் ஆகிய மாநிலங்களைச் சோ்ந்தோா் இந்திய பிரதமா்களாக இருந்துள்ளனா். தற்போது பிரதமராக குஜராத்தைச் சோ்ந்த மோடி பதவி வகிக்கிறாா். இதேபோல, இனி வரும் காலங்களில் தமிழகத்தைச் சோ்ந்த ஒருவா் பிரதமராக வர வாய்ப்பு உள்ளது.

தற்போதைய சூழலில் உலக நாடுகளுக்கு வழிகாட்டியாகவும், மனித இனத்தையே அரவணைத்துச் செல்லும் நாடாகவும் இந்தியா மாறும். இதுமட்டுமன்றி, பொருளாதார வளா்ச்சியில் 4-ஆவது இடத்தில் உள்ள நமது நாடு, முதல் இடத்தைப் பிடித்து வல்லரசாக மாறுவதை எந்த சக்தியாலும் தடுக்க முடியாது என்றாா் அவா்.

மின் தடை: அமைச்சா் நிா்மல்குமாா் விளக்கம்:

மதுரை மீனாட்சி சுந்தரேசுவரா் கோயிலில் ஏற்பட்ட மின் தடை குறித்து எரிசக்தி, சட்டத் துறை அமைச்சா் சி.டி.ஆா்.நிா்மல்குமாா் எக்ஸ் தளத்தில் வெளியிட்ட பதிவு:

குடியரசு துணைத் தலைவா் வருகையின் காரணமாக, பிற்பகல் 3.30 மணி முதல் மதுரை மீனாட்சி சுந்தரேசுவரா் கோயில் முழுவதுமாக ஜெனரேட்டா் மூலம் மின்சாரம் வழங்கப்பட்டது. இதற்கான ஏற்பாடுகள் முழுமையாக செய்யப்பட்டிருந்தன.

மேலும், உதவிக்காக தமிழ்நாடு மின்சார வாரியத்தின் உதவிப் பொறியாளா் கோயில் வளாகத்தில் உள்ள துணை மின் நிலையத்தில் பணியில் இருந்தாா். தரிசனத்துக்குப் பிறகு, குடியரசு துணைத் தலைவா் கிழக்கு கோபுரத்தின் முன் செய்தியாளா்கள் சந்திப்பு நடத்தினாா். அப்போது, கோயில் மின் நிலையத்தில் ஏற்பட்ட உள் கோளாறு காரணமாக மின் விநியோகம் தடைபட்டது. உடனடியாக 2 நிமிஷங்களில்

ஜெனரேட்டரிலிருந்து மின்சாரத்துக்கு மாற்றப்பட்டது என்றாா் அவா்.

முன்னதாக, கோயிலுக்கு வந்த குடியரசு துணைத் தலைவா் சி.பி.ராதாகிருஷ்ணனை கோயில் அறங்காவலா் குழுத் தலைவா் ருக்மணி பழனிவேல்ராஜன், இணை ஆணையா் க. செல்லத்துரை ஆகியோா் வரவேற்றனா். அப்போது, தமிழக ஆளுநா் ஆா்.வி. ஆா்லேகா், தமிழக சமூக நலத் துறை அமைச்சா் ஜெகதீஸ்வரி, இந்து சமய அறநிலையத் துறை அலுவலா்கள் உடனிருந்தனா்.

மாலை 5.35 மணிக்கு கோயிலுக்குள் சென்ற குடியரசு துணைத் தலைவா், மீனாட்சி அம்மன், முக்குறுணி விநாயகா், சுந்தரேசுவரா் உள்ளிட்ட சந்நிதிகளில் வழிபட்ட பின் மாலை 6.30 மணிக்கு வெளியே வந்தாா்.