விஜய் பிரதமா் வேட்பாளா் என்ற கருத்தை காங்கிரஸ் ஏற்காது யுசிபிஐ மாநிலச் செயலா் பாஸ்கரன்

விஜய் பிரதமா் வேட்பாளா் என்ற கருத்தை காங்கிரஸ் ஏற்றுக் கொள்ளாது என ஐக்கிய இந்திய கம்யூனிஸ்ட் கட்சியின் மாநிலச் செயலா் பாஸ்கரன் தெரிவித்தாா்.

இதுகுறித்து மதுரையில் செய்தியாளா்களிடம் அவா் கூறியதாவது:

தமிழக வெற்றிக் கழகத்தை பாஜகவின் ‘பி’ டீம், ‘சி’ டீம் என திமுக, அதிமுகவினா் கூறுவது தவறு. ஆா்.எஸ்.எஸ்., பாஜகவின் நிழல்தான் தவெக. காங்கிரஸ், விசிகவினா் தவெகவில் இணைந்து திமுக முதுகில் மட்டுமல்லாமல், தமிழக மக்களின் முதுகிலும் குத்திவிட்டனா்.

காங்கிரஸ் கட்சியைச் சோ்ந்த பிரவீன் சக்கரவா்த்தி, மாணிக்கம்தாகூா் கூறுவதை மட்டுமே ராகுல்காந்தி கேட்கிறாா். காங்கிரஸ் கட்சியை ராகுல்காந்தி வழி நடத்துகிறாரா? அல்லது பிரவீன் சக்கரவா்த்தியா எனத் தெரியவில்லை.

விஜய் பிரதமா் வேட்பாளா் என்ற கருத்தை காங்கிரஸ் ஒருபோதும் ஏற்றுக் கொள்ளாது. சென்னையில் அனைத்துத் தொகுதிகளிலும் தவெக வெற்றி பெற்றது சந்தேகத்தை ஏற்படுத்துகிறது.

வாக்குப் பதிவு இயந்திரங்கள் முறைகேடுகளுக்கு எதிராக குரல் கொடுக்கும் ராகுல்காந்தி, முன்னாள் முதல்வா் மு.க.ஸ்டாலின் ஆகியோா் கடந்த 3 மாதங்களாக குரல் கொடுக்காதது ஏன் எனத் தெரியவில்லை என்றாா் அவா்.