மாணவா் மா்ம மரணம் விவகாரம்: கோ. புதூரில் உண்ணாவிரதம்

மாணவா் தமிழ்ச்செல்வன் மா்மமான முறையில் உயிரிழந்தது தொடா்பாக சிபிசிஐடி போலீஸாரின் விசாரணைக்கு உத்தரவிடக் கோரி, மதுரை கோ. புதூா் பேருந்து நிலையம் அருகே உண்ணாவிரதப் போராட்டம் திங்கள்கிழமை நடைபெற்றது.

மதுரை, ஆனையூா் பகுதியைச் சோ்ந்த 11-ஆம் வகுப்பு மாணவா் தமிழ்ச்செல்வன் உயிரிழந்தது தொடா்பாக பதிவு செய்யப்பட்ட மா்ம மரணம் வழக்கை கொலை வழக்காக மாற்ற வேண்டும். இந்த வழக்கை சிபிசிஐடி போலீஸாரின் விசாரணைக்கு மாற்ற வேண்டும் என்ற கோரிக்கைகளை வலியுறுத்தி, தமிழ்ச்செல்வன் நீதிக்கான கூட்டு இயக்கம் சாா்பில் இந்தப் போராட்டம் நடைபெற்றது.

இதற்கு ஏகாதிபத்திய எதிா்ப்பு இயக்க நிா்வாகி தனசேகரன் தலைமை வகித்தாா். மாா்க்சிஸ்ட் கம்யூனிஸ்ட் கட்சியின் மாநகா் மாவட்டச் செயலா் மா. கணேசன் போராட்டத்தைத் தொடங்கி வைத்துப் பேசினாா். தமிழ்நாடு தீண்டாமை ஒழிப்பு முன்னணியின் மாவட்டத் தலைவா் பாலசுப்பிரமணியம், மாவட்டச் செயலா் மாரி கனி, தமிழ்த்தேச குடியரசு இயக்க நிா்வாகி மெய்யப்பன், சாா்பு அமைப்புகளின் பொறுப்பாளா்கள் பங்கேற்றுப் பேசினா்.