இளைஞரைத் தாக்கி செல்லிடப்பேசி, நகை, பணம் பறிப்பு: 4 பேர் மீது வழக்கு

ராமநாதபுரம் அருகே  செவ்வாய்க்கிழமை இரவு இளைஞரைத் தாக்கி ரூ.47,300 மதிப்பிலான பொருள்களை பறித்துச் சென்றுள்ளனர்.
ராமநாதபுரம் அருகே பனைக்குளம் தெற்குத்தெருவைச் சேர்ந்த செய்யது முகம்மது மகன் நிகால் அஹமது(21). இவர் ராமநாதபுரம் அருகே வாலாந்தரவை தெற்குகாட்டூர் பகுதியில் உள்ள பேக்கரி ஒன்றில் நின்று கொண்டிருந்தபோது  திடீரென 4 பேர் கொண்ட கும்பல் அவரைத் தரக்குறைவாக பேசியும், தாக்கியும் அவரிடமிருந்த ரூ.20 ஆயிரம் மதிப்பிலான செல்லிடப்பேசி, ரூ.25 ஆயிரம் ரொக்கம் மற்றும் ரூ.2300 மதிப்பிலான வெள்ளிச் சங்கிலி உள்பட ரூ.47300 மதிப்பிலான பொருள்களை பறித்து சென்று விட்டனராம். தாக்குதலில் காயம் அடைந்த நிஹால் அஹமது ராமநாதபுரம் தலைமை அரசு மருத்துவமனையில் சேர்க்கப்பட்டு சிகிச்சை பெற்று வருகிறார். 
சம்பவம் தொடர்பாக அவர் கொடுத்த புகாரின் பேரில் தெற்குகாட்டூரைச் சேர்ந்த தர்மராஜ் மகன் நாகவேல், அதே ஊரைச் சேர்ந்தவர்களான சூரப்புலி மகன் கார்த்திக், வாலாந்தரவை அம்மன் கோவில் கிராமத்தைச் சேர்ந்தவர்களான மதி மகன் மகேந்திரன், ஆறுமுகம் மகன் சீம்சுந்தர் ஆகிய 4 பேர் மீதும் கேணிக்கரை போலீஸார் வழக்குப்பதிவு செய்து அவர்களை தேடி வருகின்றனர்.