கமுதி சாலையில் தேங்கிய மழைநீரால் பொதுமக்கள்அவதி

கமுதி பேரூராட்சியில் தெருக்களில் மழை நீா் தேங்கியுள்ளதால் பொதுமக்கள் அவதிக்குள்ளாயினா்.

ராமநாதபுரம் மாவட்டம் கமுதி மற்றும் அதனை சுற்றியுள்ள பகுதிகளில் கடந்த 2 நாள்களாக பரவலாக மழை பெய்து வருகிறது. இதனால் முத்துமாரிநகா் உள்ளிட்ட பல்வேறு சாலைகளில் முழங்கால் அளவுக்கு மழை நீா் தேங்கியுள்ளது. இதனால் பொதுமக்கள் அவதி அடைந்துள்ளனா். முத்துமாரி நகரில் அமைக்கப்பட்ட கழிவு நீா் கால்வாய் திட்டமிடலின்றி கட்டப்பட்டுள்ளதால், சிறு மழை பெய்தாலும், கழிவுநீருடன் மழை நீா் தேங்கி சுகாதாரக்கேட்டை ஏற்படுத்துகிறது.

இதுகுறித்து முத்துமாரி நகரைச் சோ்ந்த சுந்தர்ராஜ் கூறியது: கமுதி முத்துமாரி நகரில் 300-க்கும் மேற்பட்ட வீடுகள் உள்ளன. இவற்றிலிருந்து வெளியேறும் கழிவுநீா் மற்றும் சிறு மழை பெய்தாலும் இப்பகுதியில் தேங்கும் மழை நீரை வெளியேற்ற பேரூராட்சி நிா்வாகம் எந்த நடவடிக்கையும் எடுப்பதில்லை.

தற்போது மழைக்காலம் தொடங்கி விட்டதால் மாவட்ட நிா்வாகம் தலையிட்டு முத்துமாரி நகரில் மழை நீா் மற்றும் கழிவுநீா் வெளியேறும் வகையில் நிரந்தர தீா்வு காண வேண்டும். இல்லாவிடில் பொதுமக்களை திரட்டி போராட்டம் நடத்தப்படும் என்றாா்.