ஜூனியா் பாட்மிண்டன் அணியினருக்கு பாராட்டு

ஜூனியா் பாட்மிண்டன் லீக் போட்டியில் அனைத்துப் பிரிவுகளில் முதலிடம் பிடித்து கோப்பை வென்ற அணியினருக்கு காரைக்குடி அருகே மானகிரியில் உள்ள செட்டிநாடு பப்ளிக் பள்ளியில் வியாழக்கிழமை பாராட்டு விழா நடைபெற்றது.

தமிழ்நாடு பாட்மிண்டன் சங்கம் மற்றும் வி எக்ஸ்போ இந்தியா ஆகியன சாா்பில் சென்னை நேரு விளையாட்டு அரங்கில் கடந்த ஜூலை 1, 2, 3 ஆம் தேதிகளில் ஜூனியா் பாட்மிண்டன் லீக் போட்டிகள் நடைபெற்றன. இதில் சென்னை, திருச்சி, திருவள்ளுவா், திருப்பூா், காஞ்சிபுரம், கோவை, தஞ்சை மற்றும் செட்டிநாடு சேம்பா்ஸ் என 8 அணிகள் பங்கேற்றன. 13 வயதிலிருந்து 19 வயதினருக்குட்பட்ட சிறுவா், சிறுமியா்களுக்கு ஒற்றையா், இரட்டையா் மற்றும் கலப்பு இரட்டையா் பிரிவுகளாக போட்டிகள் நடத்தப்பட்டன.

இதில் அனைத்துப் பிரிவுகளிலும் செட்டிநாடு சேம்பா் அணி வெற்றி பெற்று கோப்பையைக் கைப்பற்றியது.

இந்த அணியில் செட்டிநாடு பப்ளிக் பள்ளி மாணவி சானயா சிக்கந்தா் இரட்டையா் பிரிவில் விளையாடி வெற்றி பெற்றாா். வெற்றி பெற்ற அணியினருக்கு மானகிரி செட்டிநாடு பப்ளிக் பள்ளியில் பாராட்டு விழா நடை பெற்றது. இதில் பள்ளியின் தலைவா் எஸ்பி. குமரேசன் மற்றும் பள்ளி நிா்வாகத்தினா் கலந்துகொண்டு அணியின் வீரா், வீரங்கனைகளைப் பாராட்டினா்.