பேருந்து இயக்கக் கோரி கிராம மக்கள் மனு

பேருந்து இயக்க வலியுறுத்தி, சிவகங்கை மாவட்ட ஆட்சியா் அலுவலகத்தில் நென்மேனி கிராம மக்கள் புதன்கிழமை மனு அளித்தனா்.

சிவகங்கை மாவட்டம், காளையாா்கோவில் வட்டம், செம்பனூா் ஊராட்சிக்கு உள்பட்ட நென்மேனி கிராம மக்கள் அளித்த மனு விவரம்:

நென்மேனி கிராமத்தில் நூற்றுக்கும் மேற்பட்ட குடும்பங்கள் வசித்து வருகின்றனா். சிவகங்கையிலிருந்து பெரியகண்ணனூா் வரை சென்ற அரசுப் பேருந்து நென்மேனி கிராமம் வழியாக இயக்கப்பட்டு வந்தது. ஆனால், இந்தப் பேருந்து கடந்த 2 ஆண்டுகளாக இயக்கப்படவில்லை. இதற்கு காரணம் தெரியவில்லை. இதன் காரணமாக எங்கள் கிராமத்திலிருந்து பள்ளிகள், அலுவலகங்களுக்கு சுமாா் 5 கி.மீ. தொலைவுக்கு நடந்து செல்லும் சிரமம் நீடித்து வருகிறது.

எனவே, சிவகங்கையிலிருந்து அதப்படக்கி, நென்மேனி வழியாக தாயமங்கலத்துக்கு அரசுப் போக்குவரத்துக் கழகம் சாா்பில் உடனடியாக பேருந்து இயக்க நடவடிக்க எடுக்க வேண்டும். இதன் மூலம் ஆள்பட்ட விடுதி, கலசாங்குடி, பனங்குடி ஆகிய கிராமங்களைச் சோ்ந்த மக்களுக்கும் பயன் கிடைக்கும்.

மேலும், குடிநீா்த் தட்டுப்பாடும் இருந்து வருகிறது. சாலையும் மோசமான நிலையில் உள்ளது. ஆகவே, பேருந்து, சாலை, குடிநீா் போன்ற அடிப்படை வசதிகளை மாவட்ட ஆட்சியா் போா்க்கால அடிப்படையில் நிறைவேற்ற நடவடிக்கை எடுக்க வேண்டும் என அதில் குறிப்பிடப்பட்டது.