தனியார் மதுக்கூடத்தில் பதுக்கிய  328 மதுபாட்டில்கள் பறிமுதல்; 4 பேர் கைது

தேனி  அருகே வியாழக்கிழமை தனியார் மதுக்கூடத்தில்  கணக்கில் காட்டாமல் வைத்திருந்த 328 மதுபாட்டில்களை போலீஸார் பறிமுதல் செய்து, அதன் ஊழியர்கள் 4 பேரை கைது செய்தனர்.
தேனி மாவட்டம் ஓடைப்பட்டி அருகேயுள்ள காமாட்சிபுரத்தில் தனியார் மதுக்கூடம் இயங்கி வருகிறது. இக்கூடத்தின் செயல்பாடுகள் குறித்து தொடர்ந்து பல்வேறு புகார்கள் போலீஸாருக்கு வந்தன. இதைத்தொடர்ந்து,  உத்தமபாளையம் மதுவிலக்கு அமலாக்கப் பிரிவு போலீஸார் மற்றும் மாவட்ட கலால்துறை அதிகாரிகள் வியாழக்கிழமை அங்கு சோதனை நடத்தினர். இதில் கணக்கில் காட்டாமல் விற்பனைக்கு வைத்திருந்த 328 மதுபாட்டில்களை பறிமுதல் செய்தனர். மேலும் இது தொடர்பாக, மதுக்கூடத்தில் பணியாற்றிய மலைச்சாமி(33),  ஜெயப்பிரபு, சுரேஷ், முத்துகுமார் ஆகிய 4 பேரை கைது செய்தனர்.