கேரள வாடல் நோய் தாக்குதல்: தென்னை மரங்கள் வெட்டி அழிப்பு

தேனி மாவட்டத்தில் தென்னை மரங்களில் நோய் தாக்குதல் நாளுக்கு நாள்அதிகரித்து வருவதால் விவசாயிகள் தென்னை மரங்களை வெட்டி அழித்து வருகின்றனர். 
   தேனி மாவட்டத்தில் தென்னை மரங்களில் கேரள வாடல் நோய் தாக்குதல் அதிகரித்து உள்ளது. மாவட்டம் முழுவதும் இந்த நோய்கள் தாக்குதல் காரணமாக பெரும்பான்மையான தென்னை மரங்களில் உற்பத்தி குறைந்துவிட்டது. இதை கட்டுப்படுத்த முடியாத நிலையில் விரக்தி அடைந்த விவசாயிகள் நோய் தாக்கிய மரங்கள் அழித்து வருகின்றனர். கடந்த 5 ஆண்டுகளில் ஆயிரக்கணக்கான ஏக்கரில் இருந்த லட்சணக்கான தென்னை மரங்களை வேரோடு வெட்டி அழித்து விட்டனர்.மேலும் உத்தமபாளையம்,கோம்பை, சீலையம்பட்டி, கோட்டூர் , மார்க்கையன்கோட்டை, சின்னமனூர் பகுதியில் 50 ஆண்டுகளுக்கு மேலான இருந்த தென்ன மரங்கள் போதுமான மழை பொழிவு இல்லாத நிலையில் கருகி அழிந்தன. இந்நிலையில் தென்னை மரங்களின் எண்ணிக்கை குறைந்து விட்டதால் தேங்காய் உற்பத்தி வெகுவாக குறைந்தது. இதனால் ரூ.10 -க்கு விற்பனையான தேங்காய் ரூ.25 வரையில் விற்பனையாகிறது. வீடுகளில் சமையலுக்கு முக்கிய தேவையாக இருக்கும் தேங்காய் விலை உயர்வால் பொதுமக்களும் பாதிக்கப்பட்டுள்ளனர்.
 இது குறித்து விவசாயிகள் தெரிவித்தது: தென்னை விவசாயத்தை நூற்றுக்கணக்கான விவசாயிகள் பல ஆண்டுகளாக தொடர்ந்து செய்து வந்தனர். ஆனால், கேரள வாடல் மற்றும் பருவமழை குறைவு காரணமாக தென்னை விவசாயம் அழிவை நோக்கி சென்றுவிட்டது. சில பகுதிகளில் மாற்று விவசாயத்துக்கு விவசாயிகள் மாறியுள்ளனர். பல இடங்களில் தோட்டங்கள் வீட்டு மனைகளாக மாற்றப்பட்டுள்ளன என்றனர்.
வேளாண்துறை அதிகாரிகள் கூறியது: கேரள வாடல் நோயை இயற்கை உரங்கள் மூலமாக படிப்படியாகக் கட்டுப்படுத்தலாம். ஆனால் நோயை கட்டுப்படுத்த சில வருடங்கள் ஆகும். தண்ணீர் பற்றாக்குறை காரணமாக ஏற்பட்ட வறட்சியால் தென்னை மரங்களை காப்பாற்ற விவசாயிகள் முயற்சி மேற்கொள்ளவில்லை என தெரிவித்தனர்.