வைகை அணை நீர்மட்டம் 65 அடியாக சரிவு: 58-ஆம் கால்வாய்க்கு தண்ணீர் திறப்பு நிறுத்தம்: விவசாயிகள் கவலை

வைகை அணையின் நீர்மட்டம் 65 அடியாக குறைந்தது. 58-ஆம் கால்வாய்க்கு தண்ணீர் திறந்துவிடுவது வியாழக்கிழமை முதல் நிறுத்தப்பட்டதால் விவசாயிகள் கவலை அடைந்துள்ளனர். 
தேனி மாவட்டம், ஆண்டிபட்டி அருகே உள்ள வைகை அணை, தென்மேற்கு பருவமழையின் காரணமாக கடந்த மாதம் முழுக்கொள்ளவான 69 அடியை எட்டியது.  இதற்கிடையே வைகை அணையில் இருந்து மதுரை, திருமங்கலம், மேலூர் பகுதி பாசனத்திற்கு கூடுதல் தண்ணீர் திறக்கப்பட்டது.  இருந்த போதிலும், முல்லைப்பெரியாறு அணையில் இருந்து கூடுதல் தண்ணீர் திறக்கப்பட்டதால், வைகை அணையின் நீர்மட்டம் 20 நாள்களுக்கும் மேலாக 69 அடியில் நிலை நிறுத்தப்பட்டது.
இந்நிலையில் சிவகங்கை, ராமநாதபுரம் மாவட்ட குடிநீர் தேவைக்காக வைகை அணையில் இருந்து  18 நாள்களுக்கு  மொத்தம் 1,560 மில்லியன் கனஅடி தண்ணீர் திறக்க அரசு உத்தரவிட்டுள்ளது.  இதனையடுத்து வைகை அணையில் இருந்து கூடுதல் தண்ணீர் திறக்கப்பட்டது. இதனால் 3 நாள்களில் வைகை அணையின் நீர்மட்டம்  4 அடி சரிந்து 65 அடியாக குறைந்துள்ளது. அணையில் நீர்மட்டம் 67 அடியாக இருந்தால் மட்டுமே 58-ஆம் கால்வாய் திட்டத்திற்கு தண்ணீர் திறந்து விட முடியும். 
தற்போது வைகை அணையின் நீர்மட்டம் 65 அடியாக குறைந்ததால், கடந்த 20 நாள்களாக  58-ஆம் கால்வாய் திட்டத்திற்கு திறந்து விடப்பட்ட தண்ணீர் வியாழக்கிழமை முதல் நிறுத்தப்பட்டது. இந்த கால்வாயில் வெள்ளோட்டமாக விநாடிக்கு 80 கன அடி தண்ணீர் திறந்து விடப்பட்ட நிலையில் பல கண்மாய்களுக்கு இன்னும் தண்ணீர் சென்றடையவில்லை. இந்நிலையில் தண்ணீர் திறப்பு நிறுத்தப்பட்டதால் 58-ஆம் கால்வாய் மூலம் பயனடையும் விவசாயிகள் கவலை அடைந்துள்ளனர்.