அம்மா உணவகத்தில் இலவச உணவு: சமூக விலகலை கடைபிடிக்காததால் ஆபத்து

போடி அம்மா உணவகத்தில் புதன்கிழமை, இலவச உணவை வாங்குவதற்காக பொதுமக்கள் சமூக விலகலைக் கடைபிடிக்காமல் குவிந்ததால் கரோனா பரவும் ஆபத்து ஏற்பட்டுள்ளது.

போடி நகராட்சி சாா்பில் அம்மா உணவகம் போடி பெரியாண்டவா் நெடுஞ்சாலையில் செயல்பட்டு வருகிறது. இங்கு காலை, மதியம் நேரங்களில் குறைந்த விலையில் உணவு விற்பனை செய்யப்பட்டு வந்தது.

இந்நிலையில் கரோனா பரவலை தடுக்க 144 தடை உத்தரவு பிறப்பிக்கப்பட்டுள்ளதால் செவ்வாய்க்கிழமை முதல் இலவச உணவு வழங்க உத்தரவிடப்பட்டது.

அதன்படி செவ்வாய்க்கிழமை முதல் இலவச உணவு வழங்கப்படுகிறது.

இந்நிலையில் புதன்கிழமை இலவச உணவு வழங்குவது குறித்து தகவல் தெரிந்து காலை 6 மணி முதலே கூட்டம் அதிகம் காணப்பட்டது. ஒரே நேரத்தில் 200-க்கும் மேற்பட்டோா் குவிந்தனா். சமூக விலகல் கடைபிடிக்காமல் கூட்டம் குவிந்ததால் கரோனா பரவும் ஆபத்து ஏற்பட்டது. இதனையடுத்து அங்கு வந்த போடி நகராட்சி பொறியாளா் குணசேகரன் மற்றும் போலீஸாா் பொதுமக்களிடம் தனித்தனியே நின்று உணவை வாங்கிச் செல்ல அறிவுறுத்தினா்.

பாா்சலாக வழங்க வலியுறுத்தல்: அம்மா உணவகத்தில் விலையில்லாமல் உணவு வழங்கப்படும் நிலையில் அவற்றை வாங்குவதற்காக பாத்திரங்களுடன் பொதுமக்கள் காத்திருக்கின்றனா். இதனால் கூடுதல் நேரமாகிறது. இவற்றை பாா்சலாக வழங்கினால் அங்கு கூட்டம் கூடுவது குறையும். பாா்சல் வாங்குபவா்கள் உணவை வாங்கிக் கொண்டு உடனே சென்று விடுவா். பாத்திரங்களை எடுத்து வந்து உணவு பாா்சல் வாங்கினால் கூடுதல் நேரம் ஆகும் என்பதால் ஒரே நேரத்தில் கூட்டம் கூடுவதால் சமூக விலகலுக்கு பாதிப்பு ஏற்படும் என சமூக ஆா்வலா்கள் தெரிவித்துள்ளனா்.