போடியில் பட்டாசுக் கடை உரிமையாளா்களுக்கு விழிப்புணா்வு

போடியில், பட்டாசுக் கடை உரிமையாளா்களுக்கு விழிப்புணா்வு நிகழ்ச்சி காவல் துறை சாா்பில் வியாழக்கிழமை நடைபெற்றது.

போடி நகா் காவல் நிலையத்தில் நடைபெற்ற இந்த நிகழ்வுக்கு வட்டாட்சியா் சந்திரசேகா் தலைமை வகித்தாா். போடி காவல் துணைக் கண்காணிப்பாளா் பெரியசாமி முன்னிலை வகித்தாா். போடி தீயணைப்பு நிலைய அலுவலா் உதயகுமாா், போடி நகா் காவல் நிலைய ஆய்வாளா் கோபிநாத் ஆகியோா் பங்கேற்றனா்.

இதில், போடி பகுதியில் உள்ள பட்டாசுக் கடை உரிமையாளா்கள் கலந்து கொண்டனா். அப்போது, தற்காலிக பட்டாசுக் கடைகளை அமைக்கும்போது கண்டிப்பாக உரிமம் பெற்றிருக்க வேண்டும். எளிதில் தீப்பற்றக் கூடிய மரம் போன்றவற்றை பயன்படுத்தி கடைகளை அமைக்கக் கூடாது. தகர மேற்கூரை அமைக்க வேண்டும். தீயணைப்பு சாதனங்கள், மணல், தண்ணீருடன் கூடிய வாளிகளை வைத்திருக்க வேண்டும்.

பொதுமக்கள் எளிதில் வந்து செல்லும் வகையில் கடை இருக்க வேண்டும். நெரிசலை தவிா்க்க வேண்டும். உரிமம் பெற்ற கடைகளை தவிா்த்து மற்ற இடங்களில் பட்டாசுகளை சேமித்து வைக்கக் கூடாது என அறிவுறுத்தப்பட்டது.