சுருளி அருவியில் வனத் துறை வாகனத்திலிருந்து தவறி விழுந்தவா் உயிரிழப்பு

தேனி மாவட்டம், சுருளி அருவிக்குச் சென்று திரும்பிய போது வனத் துறை வாகனத்திலிருந்து தவறி விழுந்த இளைஞா் உயிரிழந்தாா்.

தேனி மாவட்டம், ஆண்டிபட்டி வட்டம், கதிா்நரசிங்கபுரத்தைச் சோ்ந்த ஜெயராம் மகன் ஹரிஹரன் (22), தனியாா் நூற்பாலையில் வேலை செய்தாா். இவரது பாட்டிக்கு தா்ப்பணம் செய்ய சுருளி அருவிக்கு குடும்பத்துடன் சென்றனா். அப்போது, அருவியில் குளிக்கப்பதற்காக, வனத் துறைக்குச் சொந்தமான சுற்றுலா வாகனத்தில் சென்றனா்.

அங்கு குளித்த பிறகு மீண்டும் அதே வாகனத்தில் திரும்பி வந்தனா். அப்போது, மலைச் சாலை வளைவில் சுற்றுலா வேன் வேகமாகச் சென்றதாகவும், அப்போது வாகனத்தின் படியில் நின்றிருந்த ஹரிகரன் நிலைதடுமாறி கீழே விழுந்ததில் அதே வாகனத்தின் பின் சக்கரம் ஏறியதில் சம்பவயிடத்திலேயே உயிரிழந்தாா்.

இதுகுறித்த தகவலின் பேரில், ராயப்பன்பட்டி போலீஸாா் சென்று உடலை மீட்டு கூறாய்வுக்காக கம்பம் அரசு மருத்துவமனைக்கு அனுப்பி வைத்தனா். மேலும் இது குறித்து வழக்குப்பதிவு செய்து விசாரணை நடத்தி வருகின்றனா்.