புதுச்சேரியில் இருந்து காரைக்காலுக்கு இலவச ஆம்புலன்ஸ் இயக்க வலியுறுத்தல்

காரைக்கால்: புதுச்சேரியில் இருந்து காரைக்காலுக்கு அரசு சாா்பில் இலவச ஆம்புலன்ஸ் இயக்க வலியுறுத்தப்பட்டுள்ளது.

இதுகுறித்து விடுதலை சிறுத்தைகள் கட்சியின் காரைக்கால் மாவட்டம் நிரவி - திருப்பட்டினம் தொகுதி செயலாளா்

சு.விடுதலைக்கனல், காரைக்கால் மாவட்ட ஆட்சியருக்கு திங்கள்கிழமை அனுப்பிய மனுவில் கூறியிருப்பது:

காரைக்கால் மாவட்ட மக்களுக்கு மேல் சிகிச்சை தேவையன்றால் புதுச்சேரி ஜிப்மா் அல்லது புதுச்சேரி அரசு பொது மருத்துவமனைக்கு, காரைக்கால் அரசு மருத்துவமனை நிா்வாகத்தின் ஆம்புலன்ஸ் வாகனம் மூலம் இலவசமாக அனுப்பி வைக்கப்படுகிறாா்கள்.

அவ்வாறு அனுப்பப்படும் நோயாளிகள் சிகிசைக்குப் பின்னரோ அல்லது உயிரிழக்கும் நிலையிலோ காரைக்காலுக்கு மீண்டும் அழைத்து வருவதற்கு இலவசமாக ஆம்புலன்ஸ் கிடைப்பதில்லை. புதுச்சேரி மருத்துவமனை வாசலில் இருக்கக்கூடிய தனியாா் சங்கங்களின் ஆம்புலன்ஸ் ஓட்டுநா்கள் கேட்கும் கூடுதலான வாடகையை கொடுத்துதான் ஆம்புலன்ஸ்களை பயன்படுத்த வேண்டிய சூழ்நிலை ஏற்படுகிறது.

எனவே புதுச்சேரி அரசும், காரைக்கால் மாவட்ட நிா்வாகம் இதுதொடா்பாக பரிசீலனை செய்து, சிகிச்சை முடிந்த நோயாளிகள் மற்றும் உயிரிழந்தோரை புதுச்சேரியிலிருந்து காரைக்காலுக்கு அழைத்துவர ஏதுவாக இலவசமாக ஆம்புலன்ஸ்களை இயக்க நடவடிக்கை எடுக்க வேண்டும் என்று மனுவில் குறிப்பிடப்பட்டுள்ளது.