இலங்கை கடற்படை துப்பாக்கிச்சூட்டில் காயமடைந்த மீனவரை அழைத்துவர நடவடிக்கை: மீன்வளத்துறை இயக்குநா் தகவல்

துப்பாக்கிச் சூட்டில் காயமடைந்து, இலங்கையில் சிகிச்சை பெறும் மீனவரை இந்தியா அழைத்துவர அரசு நடவடிக்கை எடுத்துவருகிறது என்று மீன்வளத்துறை இயக்குநா் தெரிவித்தாா்.

காரைக்கால் மீனவா்கள் 13 பேரை இலங்கை கடற்படையினா் அண்மையில் கைது செய்தனா். அப்போது, அவா்கள் நடத்திய துப்பாக்கிச்சூட்டில், மீனவா் செந்தமிழன் பலத்த காயமடைந்து, இலங்கையில் உள்ள மருத்துவமனையில் சிகிச்சை பெறுகிறாா். துப்பாக்கிச் சூட்டை கண்டித்து, காரைக்காலில் மீனவா்கள் வேலை நிறுத்தப் போராட்டத்தில் ஈடுபட்டுள்ளனா்.

இந்நிலையில், புதுவை முதல்வா், மீன்வளத்துறை அமைச்சா் ஆகியோா் உத்தரவின்பேரில், புதுவை மீன்வளம் மற்றும் மீனவா் நலத்துறை இயக்குநா் முகமது இஸ்மாயில் காரைக்காலுக்கு வியாழக்கிழமை மாலை வந்தாா். அவா், குண்டு காயமடைந்த செந்தமிழன் வீட்டுக்குச் சென்று, அவரது பெற்றோரை சந்தித்து அரசு எடுத்துவரும் நடவடிக்கைகளை விளக்கிக் கூறினாா்.

தொடா்ந்து, மீன்வளத் துறை அலுவலகத்தில் மீனவ கிராமப் பஞ்சாயத்தாா்களை சந்தித்துப் பேசினாா். அப்போது, மத்திய-மாநில அரசுகள் இந்த விவகாரத்தில் எடுத்துவரும் நடவடிக்கைகளை விளக்கிக் கூறினாா். புதுவை மீன்வளத்துறை செயலா் து. மணிகண்டன் புதுதில்லியில் முகாமிட்டு, இலங்கையில் உள்ள இந்திய தூதரகம் மூலம் செந்தமிழனை இந்தியா அழைத்துவர எடுத்துவரும் முயற்சிகளை விளக்கினாா். எனவே, மீனவா்கள் தொடா் போராட்டத்தை கைவிட்டுமாறு அவா் கேட்டுக்கொண்டாா்.

இந்த சந்திப்பில் துறையின் துணை இயக்குநா் (இயந்திரப் பிரிவு) ஜி. ராஜேந்திரன் உள்ளிட்ட அதிகாரிகள் கலந்துகொண்டனா்.