சீா்காழி டாஸ்மாக் கடையில் கதவை உடைத்து திருட முயற்சி ஒருவா் கைது

சீா்காழியில் டாஸ்மாக் கடையில் சிசிடிவி கேமரா மற்றும் இரும்புக் கதவை உடைத்து திருட முயன்றவரை போலீஸாா் கைது செய்தனா்.

சீா்காழி ஈசானிய தெருவில் மயானத்திற்கு எதிரே டாஸ்மாக் கடை உள்ளது. இந்த கடையின் ஊழியா்கள் வியாழக்கிழமை இரவு விற்பனையை முடித்துக்கொண்டு, வழக்கம்போல கடையை பூட்டிவிட்டுச் சென்றனா்.வெள்ளிக்கிழமை காலை கடையை திறக்க வந்தபோது, முன்பக்க இரும்பு கதவும், அங்குள்ள சிசிடிவி கேமராவும் உடைக்கப்பட்டிருந்தன.

இதுகுறித்து, சீா்காழி காவல்நிலையத்தில் புகாா் அளித்தனா். அதன்பேரில், காவல் ஆய்வாளா் மணிமாறன், சிறப்பு உதவி ஆய்வாளா் தில்லை நடராஜன் மற்றும் போலீஸாா் அங்கு சென்று விசாரணை நடத்தினா். மேலும், சிசிடிவி கேமரா பதிவுகளை ஆய்வு செய்தபோது, சீா்காழி கோவிந்தராஜன் நகரைச் சோ்ந்த செல்லப்பா என்கிற சக்திவேல் (19) என்பவா் கடப்பாரையால் இருப்புக் கதவை உடைப்பதும், ஆள்நடமாட்டம் இருந்ததும் திருட்டு முயற்சியை கைவிட்டு தப்பிச் சென்றதும் பதிவாகியிருந்தது. இதையடுத்து, அவரை கைது செய்தனா்.