ரயில்வே மேம்பாலம் பராமரிப்பு பணி: எம்எல்ஏ ஆய்வு

மயிலாடுதுறை காவேரி நகரில் உள்ள சாரங்கபாணி நினைவு மேம்பாலம் பராமரிப்புப் பணியை எம்எல்ஏ எஸ்.ராஜகுமாா் வியாழக்கிழமை ஆய்வு செய்தாா்.

50 ஆண்டுகள் பழைமை வாய்ந்த இந்த மேம்பாலத்தில் ரூ.6 கோடி மதிப்பீட்டில் அக்.3-ஆம் தேதி முதல் சீரமைப்புப் பணிகள் நடைபெற்று வருகிறது. 90 நாள்களில் பராமரிப்புப் பணிகள் முடிக்கப்படும் என நெடுஞ்சாலைத்துறையினா் தெரிவித்திருந்த நிலையில் பணிகளை விரைந்து முடிக்க மாவட்ட நிா்வாகம் மற்றும் அமைச்சா்கள் அறிவுறுத்தியிருந்தனா்.

பணிகள் தொடங்கி 75 நாள்கள் ஆகிவிட்ட நிலையில் மேம்பாலத்தில் மேல்பகுதியில் இணைப்புகளுக்கு கான்கிரீட் போடப்பட்டு மேல்பகுதியில் புதிதாக தாா்ச்சாலைகள் போடும் பணியும் நிறைவடைந்துள்ளது.

பாலத்தின் பக்கவாட்டில் உள்ள சேதமடைந்த கைப்பிடிச் சுவா்களை அகற்றிவிட்டு புதிதாக கட்டும் பணிகள் நடைபெற்று வருகிறது. இப்பணிகளை எம்.எல்.ஏ எஸ்.ராஜகுமாா் வியாழக்கிழமை ஆய்வு மேற்கொண்டாா் (படம்). பணிகளை உரிய காலத்திற்கு முன்பே முடித்து மக்கள் பயன்பாட்டிற்கு பாலத்தை திறந்துவிட அதிகாரிகளுக்கு அவா் ஆலோசனை வழங்கினாா்.

பின்னா், எம்எல்ஏ எஸ்.ராஜகுமாா் செய்தியாளா்களிடம் கூறியது: ரயில்வே மேம்பாலம் பராமரிப்பு பணிகள் 90 சதவீதம் முடிவடைந்துள்ளது. ரயில்வே டிராக் மேல்பகுதியில் உள்ள நடை பாதைகளை ரயில்வே துறையினா் சீரமைக்க வேண்டும். அதற்கான முயற்சியில் நெடுஞ்சாலைத்துறையினா் ஈடுபட்டுள்ளனா்.

நகராட்சி சாா்பில் மின்விளக்கு வசதிகள் உள்ளிட்ட சில பணிகள் செய்ய வேண்டி உள்ளது. விரைவாக பணிகளை முடித்து வரும் கிறிஸ்துமஸ் பண்டிகைக்கு முன்னதாக டிச.24-ஆம் தேதி திறக்கப்படும் என்றாா் .

கோட்டப் பொறியாளா் மணிசுந்தரம், உதவி கோட்டப்பொறியாளா் சூரியமூா்த்தி மற்றும் அதிகாரிகள் உடனிருந்தனா்.