தாட்கோ திட்டத்தில் தொழில் தொடங்க ஆதிதிராவிடர்கள் விண்ணப்பிக்கலாம்

நாகை மாவட்டத்தைச் சேர்ந்த ஆதிதிராவிடர்கள் தாட்கோ திட்டத்தில் தொழில் தொடங்க விண்ணப்பிக்கலாம் என தெரிவித்துள்ளார் மாவட்ட ஆட்சியர் சீ. சுரேஷ்குமார். 
இதுகுறித்து அவர் வெளியிட்டுள்ள செய்திக் குறிப்பு: தாட்கோ மூலம் ஆதிதிராவிடர்களுக்காக செயல்படுத்தப்படும்  பொருளாதார மேம்பாட்டுத் திட்டங்களுக்கு தகுதியும், விருப்பமும் உள்ளவர்களிடமிருந்து விண்ணப்பங்கள் இணையதளம் மூலம் வரவேற்கப்படுகிறது. 18 முதல் 65 வரையுள்ளவர்கள் விண்ணப்பிக்கலாம். குடும்ப ஆண்டு வருமானம் ரூ . 1 லட்சத்துக்குள் இருக்க வேண்டும். மகளிர் வேளாண் நிலம் வாங்கும் திட்டம், நில மேம்பாட்டுத் திட்டம், துரித மின் இணைப்புத் திட்டம் , தொழில் முனைவோர் மேம்பாட்டுத் திட்டம் (பெட்ரோல், டீசல், எரிவாயு  சில்லறை விற்பனை நிலையம் அமைத்தல்).
தொழில் முனைவோர் திட்டம், இளைஞர்களுக்கான சுயவேலை வாய்ப்புத் திட்டம் , மருத்துவ மையம், மருந்தியல்,  கண் கண்ணாடியகம், முட நீக்கு மையம்,  ரத்த பரிசோதனை நிலையம் அமைத்தல் மற்றும் மேம்படுத்துதல், சுய உதவிக் குழுக்களுக்கான சுழல்நிதி மற்றும் பொருளாதாரக் கடனுதவி,  மானியம்  திட்டத் தொகையில் 50 சதவீதம் மாவட்ட  ஆட்சியர்  விருப்புரிமை நிதி திட்டம், இந்திய குடிமைப் பணி முதன்மைத் தேர்வு  எழுதுவோருக்கு நிதியுதவி,  சட்டப் பட்டதாரிகளுக்கு நிதியுதவி. பட்டயக் கணக்கர் நிறுவனச் செயலர்களுக்கு நிதியுதவி , தொழில் தையல் கூட்டுறவுச் சங்கங்களுக்கு நிதியுதவி ஆகிய திட்டங்கள் மூலம்  பயன்பெற விரும்பும் இந்து  ஆதிதிராவிடர்கள் இணையதளம் மூலம் விண்ணப்பிக்கலாம். 
விண்ணப்பம் படியிறக்கம் செய்தோ அல்லது  நகலை ஜெராக்ஸ் எடுத்து சமர்ப்பிக்கக் கூடாது. விண்ணப்பதாரர் தனது முழு விவரங்கள், புகைப்படம், இருப்பிடச் சான்றிதழ், சாதிச் சான்றிதழ், வருமானச் சான்று, பட்டா, சிட்டா ( நிலம் வாங்குதல் மற்றும் நிலம் மேம்பாட்டுத் திட்டம்) குடும்ப அட்டை  , ஆதார் எண், விண்ணப்பதாரரின் செல்லிடப்பேசி எண், மின்னஞ்சல் முகவரி , திட்டங்களின் விவரங்கள் முதலியவற்றின் ஆவணங்களை ஸ்கேன் செய்து இணைய தளத்தில் பதிவு செய்ய வேண்டும். மேலும்  திட்டங்களுக்கு ஏற்றார்போல் கூடுதல் ஆவணங்களையும் சமர்ப்பிக்க வேண்டும். அறிவிக்கப்பட்ட 24  மணி நேரமும் விண்ணப்பங்களை இணைய தளம் மூலம் பதிவு செய்யலாம். இதேபோல், மாவட்ட  ஆட்சியர் அலுவலக வளாகத்தில் உள்ள தாட்கோ மேலாளர்அலுவலகத்தில் ரூ. 60 செலுத்தியும் விண்ணப்பங்களை பதிவு  செய்யலாம்.