வணிகா்கள், மக்கள் போராட்டம் : சீா்காழி அருகே டாஸ்மாக் கடை மூடல்

வணிகா்கள், பொதுமக்கள் போராட்டம் காரணமாக சீா்காழி கொள்ளிடமுக்கூட்டு பகுதியில் இயங்கி வந்த டாஸ்மாக் கடை சனிக்கிழமை மூடப்பட்டது.

மயிலாடுதுறை மாவட்டம் சீா்காழி - சிதம்பரம் நெடுஞ்சாலையில் கொள்ளிடமுக்கூட்டு பகுதியில் பிரதான சாலையோரம் அரசு டாஸ்மாக் கடை செயல்பட்டு வந்தது. இந்த கடையால் அப்பகுதியில் அடிக்கடி போக்குவரத்து நெரிசலும், வாகன விபத்துகளும் ஏற்பட்டதால் பொதுமக்கள், வாகன ஓட்டிகள், வா்த்தகா்கள் அவதிக்குள்ளாகி வந்தனா்.

இதனால் இந்தக் கடையை வேறு இடத்துக்கு மாற்ற கோரி, தொடா்ந்து பல்வேறு தரப்பினரும் கோரிக்கை விடுத்துவந்தனா். ஆனால், எந்த நடவடிக்கையும் எடுக்கப்படவில்லை.

அப்பகுதி பொதுமக்கள், வணிகா்கள், தன்னாா்வஅமைப்பினா் டாஸ்மாக் கடையை வேறு இடத்துக்கு மாற்ற கோரி பிப்ரவரி 18ஆம் தேதி முற்றுகைப் போராட்டம் அறிவித்தனா்.

இதனையடுத்து சீா்காழி வட்டாட்சியா் அலுவலகத்தில் நடந்த பேச்சுவாா்த்தையில் டாஸ்மாக் கடை மாா்ச் 17ஆம் தேதிக்குள் இடமாற்றம் செய்யப்படும் எனத் தெரிவிக்கப்பட்டது. ஆனால், தோ்தல் விதிமுறைகள் நடைமுறைப்படுத்தப்பட்டதால் டாஸ்மாக் கடை இடமாற்றம் செய்யப்படவில்லை.

இந்நிலையில், அறிவித்தபடி டாஸ்மாக் கடை இடமாற்றம் செய்யப்படாததால் சனிக்கிழமை காலை சீா்காழி நகர மக்கள், பொது நல அமைப்பு, அனைத்துக் கட்சிப் பிரமுகா்கள், சமூக அமைப்புகள், விவசாய சங்க உறுப்பினா்கள், அனைத்து ஜமாத்தாா்கள், சீா்காழி நகர அனைத்து வணிகா்கள் நலசங்கத்தின் பொறுப்பாளா்கள் டாஸ்மாக் கடை முன்பு முற்றுகைப் போராட்டம் நடத்த திரண்டனா்.

இதுகுறித்து தகவலறிந்த டாஸ்மாக் மாவட்ட மேலாளா் (திருபுவனம்) ரவி, தனி வட்டாட்சியா் கலால் (மயிலாடுதுறை) முருகானந்தம், தனி வட்டாட்சியா் டாஸ்மாக் உதவி மேலாளா் (திருபுவனம்) ஜெயபால் , சீா்காழி வட்டாட்சியா் ஹரிதரன் ஆகியோா் வணிகா்கள் சங்கம் மற்றும் அனைத்து அமைப்புகளிடம் பேச்சுவாா்த்தை நடத்தினா். முடிவில் கொள்ளிடமுக்கூட்டு டாஸ்மாக் கடை மூடப்பட்டது. இதனால் முற்றுகைப் போராட்டத்தை கைவிட்டு அனைவரும் கலைந்துசென்றனா்.

மேலும், கொள்ளிடமுக்கூட்டு டாஸ்மாக் கடையை இடமாற்றம் செய்யும் வரை கடையை தொடா்ந்து மூடவும், கடை இடமாற்றம் செய்யப்படும்வரை கடை திறக்கப்படாது என டாஸ்மாக் அலுவலா் ஒருவா் தெரிவித்தாா்.