ரேஷன் கடைகள் மீண்டும் திறப்பு: ஊழியா்கள் மகிழ்ச்சி

புதுச்சேரி மாநிலத்தில் 4 ஆண்டுகளுக்குப் பிறகு ரேஷன் கடைகள் மீண்டும் திறக்கப்படவுள்ளதால் கடை ஊழியா்கள் மகிழ்ச்சி அடைந்துள்ளனா்.

புதுச்சேரி, மாநில மக்களுக்கு ரேஷன் கடைகள் மூலம் இலவச அரிசி மற்றும் அத்தியாவசியப் பொருள்கள், தீபாவளி, பொங்கல் பரிசுப் பொருள்கள், பேரிடா் கால நிவாரண உதவி ஆகியவைகள் வழங்கப்பட்டு வந்தன. இதற்காக மாநிலத்தில் கூட்டுறவுத் துறையின்கீழ் 317 ரேஷன், பாப்ஸ்கோ 35, தனியாா் 25 என மொத்தம் 377 நியாய விலைக் கடைகள் இயங்கி வந்தன. காரைக்கால் பகுதிகளில் 99 கடைகள் இயங்கின.

கடந்த ஆட்சியில் அரசுக்கும், மாநில ஆளுநருக்குமிடையே மோதல்போக்கு நீடித்ததால் பயனாளிகளுக்கு வங்கிக் கணக்கில் நேரடியாக நிதியை செலுத்தும் முறை அமல்படுத்தப்பட்டது. பணியாளா்களும் சம்பளம் மற்றும் வேலையின்றி தவிப்புக்கு உள்ளாகினா். தொடா்ந்கு நடைபெற்ற பேரவைத் தோ்தலுக்குப் பின்னா் என்.ஆா். காங்கிரஸ், பாஜ கூட்டணி ஆட்சி அமைத்தது.

இதையடுத்து மாநில அரசு மீண்டும் இலவச அரிசியை ரேஷன்கடைகள் மூலம் விநியோகம் செய்ய நடவடிக்கை மேற்கொண்டது. மாநில முதல்வா் ரங்கசாமி தீபாவளி பண்டிக்கைக்காக அறிவித்த 10 கிலோ அரிசி, 2 கிலோ சா்க்கரை இதுவரை வழங்கப்படவில்லை. இதனால் அரசுக்கு பல்வேறு பிரசனைகள் எழுந்தன. இந்நிலையில், முதல்வா் ரங்கசாமி திபாவளிக்காக அறிவிக்கப்பட்ட அரிசி மற்றும் சா்க்கரைஆகியப் பொருள்கள் ரேஷன் கடைகள் மூலம் விநியோகம் செய்யப்படும் என்று அதிரடியாக அறிவித்துள்ளாா். இந்த அறிவிப்பு ஊழியா்களுக்கு மகிழ்ச்சியை ஏற்படுத்தியுள்ளது.

இதுகுறித்து , நியாய விலைக்கடை ஊழியா் சங்கப் பொறுப்பாளா் மனோகா் கூறியது: முதல்வா் அறிவித்தப்படி, அடுத்தவாரம் ரேஷன் கடைகள் திறக்கப்பட உள்ளன. ஊழியா்களுக்கு நிலுவையில் உள்ள சம்பளம் முதல் கட்டமாக 2 மாதங்களுக்கு வழங்கப்படும் என்றும் அறிவித்துள்ளாா். மாநிலத்தில் 4 ஆண்டுகளுக்கு பிறகு ரேஷன் கடைகள் திறக்கப்பட உள்ளது மகிழ்ச்சி அளிக்கிறது என்றாா்.