கருணாநிதி நலம் பெறக் கோரி அவரது தாயார் நினைவிடத்தில் கூட்டுப் பிரார்த்தனை

திருவாரூர் அருகே திமுக தலைவர் மு. கருணாநிதி உடல் நலம் பெற வேண்டி மாணவர்கள் பங்கேற்ற கூட்டுப் பிரார்த்தனை புதன்கிழமை நடைபெற்றது. 
உடல் நலம் பாதிக்கப்பட்டு சென்னையில் மருத்துவமனையில் சிகிச்சைப் பெற்று வரும் திமுக தலைவர் மு. கருணாநிதி விரைவில் குணமடைய வேண்டும் என்று பல்வேறு இடங்களில் வழிபாடு, பிரார்த்தனைகள் நடைபெறுவது அதிகரித்து வருகிறது. அந்த வகையில், திருவாரூர் அருகே காட்டூரில் திமுக தலைவர் மு. கருணாநிதியின் தாயார் அஞ்சுகத்தம்மாள் நினைவகத்தில், அப்பகுதியில் செயல்பட்டு வரும் அரசு பள்ளி மாணவர்கள் மற்றும் தனியார் கல்லூரி மாணவர்கள் கருணாநிதி உடல் நலம் பெற வேண்டும், திருவாரூருக்கு வந்து மக்கள் மற்றும் தொண்டர்களை சந்திக்க வேண்டும் என்று மெழுகுவர்த்தி ஏந்தி கூட்டுப் பிரார்த்தனையில் ஈடுபட்டனர். தொடர்ந்து, நினைவகத்தில் மாணவர்கள் மலர் தூவி பிரார்த்தனை செய்தனர். இதில், திமுக மாவட்டச் செயலர் பூண்டி கே. கலைவாணன் உள்ளிட்டோர் பங்கேற்றனர்.