விவசாயத் தொழிலாளர் சங்க மாநாடு தொடங்கியது

தமிழ் மாநில விவசாயத் தொழிலாளர் சங்க திருவாரூர் மாவட்ட 27-ஆவது இரண்டு நாள் மாநாடு நீடாமங்கலத்தில் ஞாயிற்றுக்கிழமை தொடங்கியது. 
சங்க மாவட்ட தலைவர் எஸ். வீராச்சாமி தலைமையில் நடைபெற்ற நிகழ்ச்சியில், வரவேற்புக்குழுச் செயலாளர் நடேச. தமிழார்வன் வரவேற்றார். மன்னார்குடியிலிருந்து எடுத்து வரப்பட்ட 27-ஆவது மாநாட்டு கொடியை முன்னாள் எம்.பி.
எம். செல்வராஜ் பெற்றுக் கொண்டார். தியாகிகள் நினைவுச் சின்னத்தை முன்னாள் எம்எல்ஏ. என்.பெரியசாமி திறந்து வைத்தார். கூத்தாநல்லூரிலிருந்து தியாகி சாமிநாதன் நினைவுச்சுடர் கொண்டுவரப்பட்டது. மாநாட்டு கொடியேற்றப்பட்டது. முன்னாள் எம்.பி. மறைந்த எம். காத்தமுத்துவின் திருவுருவப்படத்துக்கு இந்திய கம்யூனிஸ்ட் கட்சியின்மாநிலச் செயலர் இரா. முத்தரசன் மாலை அணிவித்து மரியாதை செலுத்தினார்.
இதில், இந்திய கம்யூனிஸ்ட் கட்சியின் மாவட்டச் செயலர் வை. சிவபுண்ணியம் மற்றும் கட்சி நிர்வாகிகள், விவசாயத் தொழிலாளர் சங்க நிர்வாகிகள் உள்ளிட்டோர் பங்கேற்றனர். மாநாட்டில் விவசாயத் தொழிலாளர்களின் பல்வேறு பிரச்னைகள் குறித்து விவாதிக்கப்படவுள்ளது. மாநாடு திங்கள்கிழமை நிறைவு பெறுகிறது.