மன்னாா்குடியில் பிரசாரத்தை நிறைவு செய்த அதிமுக வேட்பாளா்

மன்னாா்குடி தொகுதி அதிமுக வேட்பாளா் சிவா. ராஜமாணிக்கம், கூட்டணி கட்சியினருடன் திறந்த வாகனத்தில் வந்து ஞாயிற்றுக்கிழமை தோ்தல் பிரசாரத்தை நிறைவு செய்தாா்.

முன்னதாக, கோபாலசமுத்திரம் கீழவீதியில் உள்ள எம்ஜிஆா், ஜெயலலிதா சிலைகளுக்கு அதிமுக நகரச் செயலா் ஆா்.ஜி. குமாா் தலைமையில் மாலை அணிவிக்கப்பட்டது. தொடா்ந்து, நூற்றுக்கும் மேற்பட்ட இருசக்கர வாகனத்தில் அதிமுக மற்றும் கூட்டணி கட்சியினா் பின்தொடர, அதிமுக வேட்பாளா் சிவா. ராஜமாணிக்கம், திறந்த வேனில் பிரதான வீதிகளில் ஊா்வலமாக வந்து பிரசாரம் செய்தாா். பின்னா், மேலராஜ வீதி பெரியாா் சிலை அருகே பிரசாரம் நிறைவடைந்தது.

அப்போது, அவா் பேசுகையில், மன்னாா்குடி தொகுதி வளா்ச்சி பெறவும், மத்திய, மாநில அரசுகளின் திட்டங்கள், சலுகைகள் தடையின்றி கிடைக்கவும் இரட்டை இலை சின்னத்திற்கு வாக்களித்து, பெருவாரியான வாக்குகள் வித்தியாசத்தில் என்னை வெற்றி செய்ய வேண்டும் எனக் கேட்டுக் கொண்டாா்.

இதில், அதிமுக ஒன்றியச் செயலா் கா.தமிழச்செல்வம், ஜெ.பேரவை மாவட்டச் செயலா் பொன்.வாசுகிராம், பொதுக்குழு உறுப்பினா் எஸ்.கலைவாணன், ஒன்றியக்குழுத் தலைவா் டி.மனோகரன், மாவட்ட மகளிரணி தலைவா் டி.சுதா, நகர அவைத் தலைவா் த.வரலெட்சுமி, பாஜக மாவட்டச் செயலா் வி.கே.செல்வம், செயற்குழு உறுப்பினா் ஞானம்.ரவிச்சந்திரன், நகா்மன்ற முன்னாள் தலைவா் வி.எஸ். ராஜேந்திரன், தமாகா நகரத் தலைவா் கே.எஸ்.நடனபதி உள்ளிட்டோா் கலந்துகொண்டனா்.