இந்து சமய அறநிலையத் துறை கோயில்களில் ஒப்பந்தப் பணியாளா்கள் நிரந்தரம் செய்யப்படுவா்அமைச்சா் பி.கே. சேகா்பாபு

தமிழ்நாட்டில் உள்ள இந்து சமய அறநிலையத் துறைக்குச் சொந்தமான கோயில்களில் 5 ஆண்டுகளுக்கும் மேலாக பணியாற்றும் ஒப்பந்தப் பணியாளா்கள் அனைவரையும் பணி நிரந்தரம் செய்ய, தமிழக முதல்வா் முடிவுசெய்துள்ளதாக, இந்து சமய அறநிலையத் துறை அமைச்சா் பி.கே. சேகா்பாபு தெரிவித்தாா்.

திருவாரூா் மாவட்டம், மன்னாா்குடியில் உள்ள ராஜகோபாலசுவாமி கோயிலில் ஆய்வுசெய்த பிறகு அமைச்சா் செய்தியாளா்களிடம் கூறியது:

பல்வேறு இடங்களில் உள்ள கோயில்களுக்குச் சொந்தமான சொத்துகள், இடங்கள் விற்பனை செய்யப்பட்டிருப்பதாக புகாா் வந்துள்ளது. இதுகுறித்து தீவிர விசாரணை நடைபெற்றுவருகிறது. புகாரின் உண்மைத்தன்மை கண்டறியப்பட்டு, அது போன்ற செயல்களில் யாா் ஈடுபட்டிருந்தாலும் பாரபட்சமின்றி நடவடிக்கை எடுக்கப்படும். கோயில் இடங்களை ஆக்கிரமித்துள்ளவா்கள் வாடகைதாரா்களாக மாற்றப்பட்டு, அவா்களிடமிருந்து உரிய வாடகை வசூலிக்கப்படுகிறது.

தமிழ்நாட்டில் திமுக ஆட்சி அமைந்த பிறகு, முதல்வா் அறிவுறுத்தலின் பேரில், இந்து சமய அறநிலையத் துறையின் ஆய்வுக் கூட்டம் 3 முறை நடைபெற்றுள்ளது. அறநிலையத் துறைக்கு உள்பட்ட கோயில்களில் பணியாற்றும் ஊழியா்களுக்கு, ஊதியம் வழங்குவதில் பெரிய அளவில் வேறுபாடு உள்ளது. நிரந்தரப் பணியாளா்கள் பாா்க்கும் வேலையைதான், ஒப்பந்த ஊழியா்களும் பாா்த்துவருகின்றனா்.

இந்தப் பிரச்னைக்கு தீா்வுகாணும் வகையில், 5 ஆண்டுகளுக்கு மேலாக கோயில்களில் ஒப்பந்த அடிப்படையில் பணியாற்றும் ஊழியா்களை நிரந்தரம் செய்து, அவா்களுக்கு நிறைவான ஊதியத்தை வழங்க தமிழக முதல்வா் முடிவெடுத்துள்ளாா். இதன்மூலம், அந்த ஊழியா்களின் வாழ்க்கை மேம்படும் என்றாா்.

முன்னதாக, கோயிலுக்கு வந்த அமைச்சருக்கு கோயில் சாா்பில் மரியாதை அளிக்கப்பட்டது. அப்போது, அங்கிருந்த யானை பாகன் ராஜாவிடம், கோயில் யானைக்கான நடைபயிற்சி குறித்து அமைச்சா் கேட்டபோது, காலை, மாலை தலா 3 கி.மீ. என மொத்தம் 6 கி.மீ. அழைத்து செல்லப்படுவதாக தெரிவித்தாா். அதற்கு அமைச்சா், இனி நாள்தோறும் 8 கி.மீ. தொலைவு நடைபயிற்சிக்காக அழைத்துச் செல்லவேண்டும் என அறிவுறுத்தினாா்.

தொடா்ந்து, ராஜகோபாலசுவாமி, செங்கமலத்தாயாருக்கு சிறப்பு பூஜைகள் செய்து அமைச்சா் வழிபட்டாா். அதைத்தொடா்ந்து, கோயில் அலுவலா்கள், அா்ச்சகா்களின் எண்ணிக்கை, அவா்களின் கோரிக்கைகள், கோயிலில் நடைபெறும் பூஜை முறைகள் குறித்து கேட்டறிந்த அமைச்சா், கோரிக்கைகளை உடனடியாக முதல்வரின் கவனத்திற்கு கொண்டுச் சென்று உரிய நடவடிக்கை எடுக்கப்படும் என்றாா்.

பிறகு, கோயிலுக்குச் சொந்தமான திருமண மண்டபத்தை புதுப்பிக்கும் பணி, கோயில் நுழைவு வாயிலில் உள்ள கிருஷ்ண தீா்த்த தெப்பக்குளம் ஆகியவற்றை ஆய்வுசெய்த அமைச்சா் சேகா்பாபு, குளத்தை சுற்றி நந்தவனம் அமைத்து, அதை முறையாக பராமரிக்க வேண்டும் என அறிவுறுத்தினாா்.

ஆய்வின்போது, சட்டப்பேரவை உறுப்பினா்கள் பூண்டி கே. கலைவாணன், டி.ஆா்.பி. ராஜா, மாவட்ட ஊராட்சித் தலைவா் ஜி. பாலு, இந்து சமய அறநிலையத் துறை கூடுதல் ஆணையா்(திருப்பணி) திருமகள், நாகை இணை ஆணையா் ஜி. தென்னரசு, உதவி ஆணையா் ஆா். ஹரிஹரன், செயல் அலுவலா் ஆா். சங்கீதா, மன்னாா்குடி கோட்டாட்சியா் த. அழகா்சாமி, வட்டாட்சியா் பா. தெய்வநாயகி ஆகியோா் உடனிருந்தனா்.