புதிய ரேஷன் கடைகளைத் திறக்காமல் மதுக்கடைகளைத் திறக்கும் தில்லி அரசு: மீனாட்சி லேகி குற்றச்சாட்டு

புது தில்லி: தில்லியில் புதிய ரேஷன் கடைகளைத் திறக்காமல், கேஜரிவால் தலைமையிலான ஆம் ஆத்மி அரசு தோல்வியடைந்துவிட்டதாகவும் அதேவேளையில், நகா் முழுவதும் மதுக்கடைகளைத் திறக்கத் தொடங்கி இருப்பதாகவும் மத்திய இணையமைச்சா் மீனாட்சி லேகி புதன்கிழமை குற்றம்சாட்டினாா்.

தில்லிஅரசு கொண்டு வந்துள்ள புதிய கலால் கொள்கைக்கு எதிராக தில்லி பாஜக தரப்பில் புதன்கிழமை கையெழுத்துப் பிரசாரம் நடைபெற்றது. இதில் புது தில்லி மக்களவைத் தொகுதி உறுப்பினரும், மத்திய அமைச்சருமான மீனாட்சி லேகி பங்கேற்றாா். அதன் பின்னா் அவா் செய்தியாளா்களிடம் கூறியதாவது: மதுக்கடைகளைத் திறக்க தனியாரை அனுமதிப்பது தில்லி அரசின் வருவாயைப் பாதிக்கும். மேலும், கேஜரிவால் அரசு புதிய ரேஷன் கடைகளைத் திறக்கவில்லை. புதிய ரேஷன் காா்டுகளையும் வழங்கவில்லை. ஆனால், நகா் முழுவதும் மதுக்கடைகளைத் திறந்து வருகிறது. குடிப்பழக்கத்திற்கு ஆளாகும் நபா்களால் குடும்பங்கள் பாதிக்கப்படும் என்பதால், இந்த நடவடிக்கையானது தீங்கு விளைவிக்கும் என்றாா் அவா்.

பாஜகவின் தில்லி தலைவா் ஆதேஷ் குப்தா கூறியதாவது:ஆம் ஆத்மி அரசின் கலால் வரிக் கொள்கையை பாஜக தொண்டா்கள் பல வாரங்களாக எதிா்த்து வருகின்றனா். அதைத் திரும்பப் பெறும் வரை எங்கள் போராட்டம் ஓயாது. சமப் பகிா்வு என்ற சாக்கில் நகா் முழுவதும் 850 மதுக்கடைகளை திறக்கும் தில்லி அரசின் இந்தக் கொள்கையால் மக்கள் அதிருப்தியில் உள்ளனா். இதற்குப் பதிலாக சம பகிா்வு குடிநீா், சுகாதாரம் மற்றும் மேம்பாடு, கல்வி, யமுனை நதியைச் சுத்தம் செய்தல் ஆகியவற்றில் ஏன் கேஜரிவால் அரசு கவனம் செலுத்தவில்லை? பாஜகவின் மகிளா மோா்ச்சா தலைமையிலான இந்தப் பிரசாரம் வரும் 8 முதல் 10 நாள்கள் நடைபெறும். அப்போது, 15 லட்சம் கையெழுத்துகள் சேகரிக்கப்படும். தில்லி அரசின் கலால் வரிக் கொள்கையை திரும்பப் பெறும் விவகாரத்தில் தலையிடக் கோரி குடியரசுத் தலைவரிடம் கையெழுத்துப் பட்டியல் ஒப்படைக்கப்படும் என்றாா் அவா்.