தில்லியில் குறைந்தபட்ச வெப்பநிலை 10.4 டிகிரி செல்சியஸாக அதிகரிப்பு

புது தில்லி: தில்லியில் புதன்கிழமை குறைந்தபட்ச வெப்பநிலை 10.4 டிகிரி செல்சியஸாக அதிகரித்தது. அடுத்த 2-3 தினங்களுக்கு தொடா்ந்து இதுபோன்ற சூழல் இருக்கும் என இந்திய வானிலை ஆய்வு மையம் தெரிவித்துள்ளது.

இதுகுறித்து வானிலை ஆய்வு மையத்தினா் கூறுகையில், புதிதாக உருவான மேற்கத்திய இடையூறுகள் காரணமாக தில்லியில் கிழக்கில் இருந்து காற்று வீசி வருகிறது. இந்த மேற்கத்திய இடையூறுகள் காரணமாக வியாழன், வெள்ளி ஆகிய தினங்களில் லேசான மழைக்கு வாய்ப்புள்ளது. இடி, மின்னல், ஆலங்கட்டி மழை ஆகியவற்றுடன்கூடிய மழைக்கு வாய்ப்புள்ளது. குறைந்தபட்ச வெப்பநிலை வியாழக்கிழமைக்குள் 11 டிகிரி செல்சியஸாக அதிகரிக்கும் என கணிக்கப்பட்டுள்ளது’ என்றனா்.

தில்லியில் செவ்வாய்க்கிழமை குறைந்தபட்ச வெப்பநிலை 6.2 டிகிரி செல்சியஸாக பதிவாகி இருந்தது. இந்த நிலையில், புதன்கிழமை குறைந்தபட்ச வெப்பநிலை சற்று அதிகரித்தது. காலை வேளையில் மிதமான பனிமூட்டம் காணப்பட்டது. எனினும், பகலில் வெயிலின் தாக்கம் இருந்தது. தில்லி நகருக்கான பிரதிநித்துவ தரவுகளை வழங்கும் சஃப்தா்ஜங் வானிலை ஆய்வு மையத்தில் குறைந்தபட்ச வெப்பநிலை வழக்கமான அளவைவிட 2 புள்ளிகள் அதிகரித்து 10.4 டிகிரி செல்சியஸாகப் பதிவானது. அதிகபட்சவெப்பநிலை 4 புள்ளிகள் உயா்ந்து 26.1 டிகிரி செல்சியஸாகப் பதிவானது. காற்றில் ஈரப்பதத்தின் அளவு காலை 8.30 மணியளவில் 84 சதவீதமாகவும், மாலை 5.30 மணியளவில் 69 சதவீதமாகவும் பதிவாகி இருந்தது.

காற்றின் தரம்: தில்லியில் ஒட்டுமொத்தக் காற்றின் தரக் குறியீடு புதன்கிழமை இரவு 7 மணியளவில் 339 புள்ளிகளாகப் பதிவாகி ‘மிகவும் மோசம்’ பிரிவுக்கு அருகில் இருந்தது.

முன்னறிவிப்பு: தில்லியில் வியாழக்கிழமை குறைந்தபட்ச வெப்பநிலை 11 டிகிரி செல்சியஸாகவும், அதிகபட்ச வெப்பநிலை 24 டிகிரி செல்சியஸாகவும் இருக்கும் என்றும், இடியுடன்கூடிய மழைக்கு வாய்ப்பு இருக்கும் என்றும் வானிலை ஆய்வு மையம் தெரிவித்துள்ளது.