தில்லியில் பரவலாக லேசான மழை: குறைந்தபட்ச வெப்பநிலை அதிகரிப்பு

புது தில்லி: தில்லியில் கடந்த சில நாள்களாக குளிரின் தாக்கம் தொடா்ந்து நீடித்து வந்த நிலையில், வியாழக்கிழமை புதிதாக உருவான மேற்கத்திய இடையூறுகள் காரணமாக மிதமான மழை பெய்தது. குறைந்தபட்ச வெப்பநிலை வழக்கமானஅளவை விட நான்கு புள்ளிகள் அதிகரித்து 12.4 டிகிரி செல்சியஸ் ஆக பதிவானது. வானம் மேகமூட்டத்துடன் காணப்பட்டது.

காலை 8.30 மணியுடன் முடிவடைந்த கடந்த 24 மணி நேரத்தில் தில்லி சஃப்தா்ஜங் வானிலை ஆய்வு மையத்தில் 0.5 மில்லி மீட்டா் மழை பதிவானது. லோதி ரோடில் 0.2 மி.மீ., ஆயாநகரில் 0.3 மி.மீ., பாலத்தில் 0.8 மி.மீ., மழை பதிவானது. வெள்ளிக்கிழமையும் மிதமான மழை இருக்கும் என்று வானிலை ஆய்வு மையம் கணித்துள்ளது. மேலும், அடுத்த மூன்று நாள்களுக்கு குறைந்தபட்ச வெப்பநிலை தொடா்ந்து சௌகரியமான அளவிலேயே இருக்கும் என்றும் வானிலை ஆய்வு மையம் தெரிவித்தது.

தில்லி நகருக்கான பிரதிநித்துவ தரவுகளை வழங்கும் சஃப்தா்ஜங் வானிலை ஆய்வு மையத்தில் குறைந்தபட்ச வெப்பநிலை வழக்கமான அளவைவிட 4 புள்ளிகள் அதிகரித்து 12.4 டிகிரி செல்சியஸாகப் பதிவானது. அதிகபட்சவெப்பநிலை 23.2 டிகிரி செல்சியஸாகப் பதிவானது. காற்றில் ஈரப்பதத்தின் அளவு காலை 8.30 மணியளவில் 89 சதவீதமாகவும், மாலை 5.30 மணியளவில் 73 சதவீதமாகவும் பதிவாகி இருந்தது. புதன்கிழமை குறைந்தபட்ச வெப்பநிலை 10.2 டிகிரி செல்சியஸ் , செவ்வாய்க்கிழமை 6.2 டிகிரி செல்சியஸ், திங்கட்கிழமை 5.3 டிகிரி செல்சியஸ் என பதிவாகியிருந்தது. அதிகபட்ச வெப்பநிலை புதன்கிழமை 25 டிகிரி செல்சியஸ் ஆக பதிவாகி இருந்தது.

காற்றின் தரம்: தில்லியில் ஒட்டுமொத்தக் காற்றின் தரக் குறியீடு வியாழக்கிழமை இரவு 7 மணியளவில் 321 புள்ளிகளாகப் பதிவாகி ‘மிகவும் மோசம்’ பிரிவுக்கு அருகில் இருந்தது.

முன்னறிவிப்பு: தில்லியில் வெள்ளிக்கிழமை குறைந்தபட்ச வெப்பநிலை 9 டிகிரி செல்சியஸாகவும், அதிகபட்ச வெப்பநிலை 21 டிகிரி செல்சியஸாகவும் இருக்கும் என்றும், மேலோட்டமான பனிமூட்டம் இருக்கும் என்றும் வானிலை ஆய்வு மையம் தெரிவித்துள்ளது.