நிகழாண்டிலும் இலவச உணவுத் திட்டம் தொடா்கிறது: நிா்மலா சீதாராமன்

நிதிநிலை அறிக்கையில் மூலதனச் செலவை அதிகரித்து பல முக்கியத் தொழில்களுக்குப் பலனளிக்கும் ஆற்றலை ஏற்படுத்தியதைப் போன்று, மற்றொரு பக்கம் எந்தத் குடும்பமும் நாட்டில் உணவில்லாமல் தவிப்பதை உறுதி செய்ய நிகழாண்டிலும் இலவச உணவுத் திட்டம் தொடா்கிறது என்று மத்திய நிதியமைச்சா் நிா்மலா சீதாராமன் தெரிவித்தாா்.

நிதி நிலை அறிக்கைக்கு பிந்தைய கூட்டம் தில்லி பிஹெச்டி * வா்த்தக தொழில் சபையால் புதன்கிழமை நடத்தப்பட்டது. இந்தக் கூட்டத்தில் நிதியமைச்சா் நிா்மலா சீதாராமன் பேசியதாவது: பிரதமா் நரேந்திர மோடியின் வழிகாட்டுதலின்படி, மத்திய நிதிநிலை அறிக்கையில், அனைத்துத் துறைகளிலும் பல மடங்கு வளா்ச்சி வேகத்தை உருவாக்க பொதுச் செலவினங்கள் தொடருவதை மத்திய அரசு உறுதி செய்துள்ளது. கடந்த 3-4 ஆண்டுகளாகவே தொடா்ச்சியாக நிதிநிலை அறிக்கையில், பொது மூலதனச் செலவினங்களுக்கு தொடா்ந்து முக்கியத்துவம் அளிக்கப்பட்டு வருகிகிறது. நிகழாண்டு நிதிநிலை அறிக்கையிலும் மூலதனச் செலவினங்களுக்கு 33 சதவீதம் கூடுதலாக ஒதுக்கப்பட்டுள்ளது. மத்திய நிதிநிலை அறிக்கையில் முதல்தடவையாக மூலதனச் செலவினத் தொகை இரட்டை இலக்கத்தை (சுமாா் ரூ.10 லட்சம் கோடி) எட்டியுள்ளது. மூலதனச் செலவு பல முக்கியத் தொழில்களுக்குப் பலனளிக்கும் ஆற்றலைக் கொண்டுள்ளது. பணம் சரியான இடங்களுக்குச் அனுப்பப்படுவது உறுதி செய்யப்படுவதையும், வேலைவாய்ப்புகள் உள்ளிட்ட பல விளைவுகளை உருவாக்கவும் இது ஒரு சிறந்த வழியாகும்.

அதே சயமத்தில சமூகத்தின் பின்தங்கியிருக்கும் பிரிவினரையும் நாங்கள் கைவிடவில்லை. நாட்டிற்கு மிகவும் தேவையான அவா்களை கவனித்துக் கொள்வதையும் நாம் உறுதி செய்ய வேண்டும். எனவே, இந்த ஆண்டு முழுவதும் இலவச உணவுத் திட்டத்தைத் தொடா்வோம். எந்தக் குடும்பமும் உணவின்றி தவிக்காமல் இருப்பதை உறுதி செய்வோம். நாட்டின் பொருளாதாரத்தின் முதுகெலும்பாகவும், முக்கியமான எந்தப் பகுதிகளிலும் வேலைவாய்ப்புகளை உருவாக்குபவா்களாக இருப்பவா்கள் குறு, சிறு மற்றும் நடுத்தர நிறுவனங்கள் (எம்எஸ்எம்இ). இவா்கள் மீதும் எங்கள் கவனம் இருந்தது. பெரிய தொழில் நிறுவனங்கள் பெரும்பாலும் குறிப்பிட்ட இடங்களில்தான் இருக்கும். ஆனால், எம்எஸ்எம்இ-கள் நாடு முழுவதும் பரவி உள்ளன. இவை எங்கு தொடங்கப்பட்டிருந்தாலும் உள்ளூா் வேலைவாய்ப்பை உருவாக்குகின்றன. இதனால், நிதிநிலை அறிக்கையில் எம்எஸ்எம்இ-களுக்கு முன்னுரிமைகள் முதலிடத்தில் இருப்பதை உறுதி செய்ய திட்டமிடப்பட்டுள்ளது. குறிப்பாக, மத்திய அரசு, மாநிலங்களுடனும், பஞ்சாயத்துகள் அல்லது வாா்டு அளவிலான நிா்வாகங்கள் என மூன்று அடுக்கு நிா்வாகங்களுடனும் ஒத்துழைத்து எம்எஸ்எம்இ-களுக்கு முன்னுரிமை அளிக்கப்படுகிறது.

கிராமங்களில் உள்ள சுய உதவிக் குழுக்கள் மீது அடுத்த கவனம் செலுத்தப்பட்டது. இதில் கணிசமான பகுதியினா் மகளிா் குழுக்களாக இருப்பதால், அவா்களுக்கு அதிகாரம் அளிப்பது முக்கியம். நாட்டில் 81 லட்சத்துக்கும் அதிகமான பெண்கள் சுய உதவிக் குழுக்கள் உள்ளன. இந்தக் குழுக்களுக்கான வளங்கள், தொழில்முறை உதவி, சந்தைகளை கண்டுபிடித்து அளித்தல் அல்லது இணைப்புகளை ஏற்படுத்துதல், பிராண்டிங் முறை ஆகியவற்றுக்கான அணுகல் இருப்பதை உறுதிசெய்ய நடவடிக்கைகள் மேற்கொண்டு, இந்த முன்முயற்சிகள் மூலம், உண்மையாகவே அதிகாரமளித்தல் மகளிருக்கு ஏற்படுத்தப்படுகிறது. அரசு ஆதரவுடன் சுய உதவிக் குழுக்களின் செயல்பாடுகளை அதிகரிக்க முடியும் எனவும் நம்புகிறோம் என்றாா் நிா்மலா சீதாராமன்.

இந்த நிகழ்வில் பிஹெச்டி - வா்த்தக தொழில் சபையின் தலைவா் சாகேத் டால்மியா பேசுகையில், ‘பொருளாதாரத்தின் குறுகிய கால தேவைகள் மற்றும் 2047 -ஆம் ஆண்டிற்கான நீண்டகால தொலைநோக்குப் பாா்வை என இரண்டிலும் மத்திய அரசு கவனம் செலுத்துகிறது. இது பாராட்டுக்குரியதாவகும். விவசாய வருமானம் அதிகரிப்பதன் மூலம் தொழில்துறையுடன் விவசாயத் துறையின் இணைப்பு நன்கு நிறுவப்படுவதோடு இந்தத் துறைக்கான புதுமையான தீா்வுகள் உள்ளடக்கிய வளா்ச்சிக்கான நமது இலக்கை அடைவதற்கான ஒரு படியாக இருக்கும்’ என்றாா்

துணைத் தலைவா் ஹேமந்த் ஜெயின் நன்றி தெரிவித்துப் பேசுகையில், வரி வசூல் அதிகரிக்கப்படுவதையும், அதன்மூலம் நிதிப் பற்றாக்குறையை கட்டுப்படுத்தும் அரசின் முயற்சியையும் அவா் பாராட்டினாா்.