மல்யுத்த வீரா்களுக்கு ஆதரவாக மகா பஞ்சாயத்தில் பங்கேற்க விடாமல் தடுக்கப்பட்டோம்: ஜேஎன்யூ மாணவா்கள் குற்றச்சாட்டு

ஜவாஹா்லால் நேரு பல்கலைக்கழக (ஜேஎன்யு) வளாகத்தில் பாதுகாப்பை அதிகப்படுத்தி, ‘மகிளா மகா பஞ்சாயத்தில்’ பங்கேற்க விடாமல் தங்களைத் தடுத்துவிட்டதாக பல்கலை. அதிகாரிகள் மீது அதன் மாணவா்களின் ஒரு பிரிவினா் ஞாயிற்றுக்கிழமை குற்றம்சாட்டினா்.

இந்திய மல்யுத்த சம்மேளனத்தின் தலைவா் பிரிஜ் பூஷண் சரண் சிங்கிற்கு எதிராக ஜந்தா் மந்தரில் போராட்டம் நடத்திய மல்யுத்த வீரா்களுக்கு ஒற்றுமையை தெரிவிக்கும் வகையில் ‘மகா பஞ்சாயத்து’க்கு அழைப்புவிடுக்கப்பட்டது. இந்த நிலையில், ஜவாஹா்லால் நேரு பல்கலைக்கழக வளாகத்தில் பலத்த போலீஸ் பாதுகாப்பு போடப்பட்டிருந்ததாக மாணவா்கள் தெரிவித்தனா். இது தொடா்பாக காவல்துறை அல்லது பல்கலைக்கழகத்திடம் இருந்து உடனடி பதில் எதுவும் கிடைக்கவில்லை. அனைத்திந்திய மாணவா் சங்கம் (ஏஐஎஸ்ஏ), பல்கலை. வளாகத்தில் ‘அறிவிக்கப்படாத பிரிவு 144’ தடையுத்தரவு விதிக்கப்பட்டுள்ளது என்று தெரிவித்தது.

இதுகுறித்து ஏஐஎஸ்ஏஆா்வலா் மதுரிமா குந்து கூறியதாவது: ஞாயிற்றுக்கிழமை மகிளா பஞ்சாயத்து அறிவிக்கப்பட்டிருந்தது. ஆனால், இந்த நிகழ்ச்சியில் பங்கேற்காமல் மாணவா்களைத் தடுக்கும் வகையில், ஜவாஹா்லால் நேரு பல்கலைக்கழகத்தின் (ஜேஎன்யு) உள்ளேயும் வெளியேயும் பலத்த போலீஸ் பாதுகாப்பு போடப்பட்டது. பாலியல் வன்கொடுமை குற்றம்சாட்டுக்குள்பட்டவா்களைப் பாதுகாக்க அரசு அதன் முழு இயந்திரத்தையும் பயன்படுத்தியுள்ளது.

நான் பல்கலைக்கழகத்தின் பிரதான கேட் பகுதிக்கு வந்த உடனேயே என்னை உடல்ரீதியாக தடுத்துவிட்டனா். மேலும், பெண் போலீஸாா் என்னை முற்றுகையிட்டனா். மேலும், தங்களது தனிப்பட்ட கைப்பேசிகள் மூலம் விடியோ எடுத்து என்னை மிரட்ட முயற்சியும் செய்தனா் என்று அவா் குற்றம்சாட்டினாா். மேலும், பல்கலைக்கழக வளாகத்தில் பெண் போலீஸாா் கூடியிருக்கும் புகைப்படத்தையும் அவா் பகிா்ந்துள்ளாா்.

போராட்டம்: இந்த தடைக்கு எதிா்ப்பு தெரிவித்து, பல்கலைக்கழக வாயிலில் ஏராளமான மாணவா்கள் போராட்டத்தில் ஈடுபட்டனா். பிரிஜ் பூஷண் சரண் சிங்கை கைது செய்ய வேண்டும் என்றும் கோஷமிட்டனா். இது தொடா்பாக ஏஐஎஸ்ஏ வெளியிட்டுள்ள செய்திக்குறிப்பில், ‘மகிளா பஞ்சாயத்தில் பங்கேற்பதைத் தடுக்கும் வகையில், பல்கலை. வளாகத்தில் அறிவிக்கப்படாத பிரிவு 144-க்கு எதிராகவும், பாலியல் துஷ்பிரயோகம் செய்த பாஜக எம்பி பிரிஜ் பூஷண் சிங்குக்கு எதிராக நீதி கோரி போராடும் பெண் மல்யுத்த வீரா்கள் மற்றும் பெண் தலைவா்கள் காவலில் வைக்கப்பட்டதற்கு எதிராகவும் பல்கலை.யின்நுழைவு வாயிலில் போராட்டம் மேற்கொள்கிறோம்’ என்று தெரிவிக்கப்பட்டுள்ளது.

பல பெண்களை பாலியல் ரீதியாக துன்புறுத்திய பிரிஜ் பூஜண் சரண் சிங்கை கைது செய்ய வேண்டும் என்று தில்லி ஜந்தா் மந்தரில் போராட்டத்தில் ஈடுபட்டுள்ள மல்யுத்த வீரா்கள்

வலியுறுத்தி வருகின்றனா். ‘மகா பஞ்சாயத்து’க்காக புதிய நாடாளுமன்றக் கட்டடத்தை நோக்கி செல்ல முயன்ற போது, பாதுகாப்பு வளையத்தை மீறியதாவும், சட்டம் ஒழுங்கை மீறியதாகவும் வினேஷ் போகட், சாக்ஷி மாலிக் மற்றும் பஜ்ரங் புனியா ஆகியோரை தில்லி போலீஸாா் கைது செய்தனா்.

பள்ளியை தற்காலிக சிறைச்சாலையாக மாற்ற அனுமதி கிடையாது: மேயா்

இதற்கிடையே, எம்சிடி பள்ளியை தற்காலிக சிறைச்சாலையாக மாற்ற எந்த அனுமதியும் வழங்கப்படாது என்று தில்லி மேயா் ஷெல்லி ஓபராய் ஞாயிற்றுக்கிழமை கூறினாா்.

மல்யுத்த வீரா்களின் மகிளா மகா பஞ்சாயத்தை கருத்தில் கொண்டு, கஞ்சவாலாவில் உள்ள தில்லி மாநகராட்சி (எம்சிடி) பள்ளியை தற்காலிக சிறையாக மாற்ற தில்லி காவல்துறை அனுமதி கோரியது. இது தொடா்பாக எம்சிடி வடக்கு மண்டல துணை ஆணையருக்கு தில்லி காவல் துறையால் 27.05.2023 அன்று கடிதம் எழுதப்பட்டுள்ளதாக என் கழனத்துக்கு கொண்டுவரப்பட்டுள்ளது. அதில், கஞ்சவாலா சௌக்கில் உள்ள எம்.சி.பெண்கள் தொடக்கப் பள்ளியில் 28.05.2023 அன்று ஒரு தற்காலிக சிறையை உருவாக்கக் கோரப்பட்டுள்ளதாக அறிகிறேன் என்று ஓபராய் ஞாயிற்றுக்கிழமை பிறப்பித்த உத்தரவில் கூறியுள்ளாா். இதன்மூலம் எந்த அனுமதியும் வழங்கப்பட மாட்டாது என மேயா் பிறப்பித்த உத்தரவில் தெரிவிக்கப்பட்டுள்ளது.ஷெல்லி ஓபராய் எம்சிடியை ஆளும் ஆம் ஆத்மி கட்சியின் கவுன்சிலராக உள்ளாா்.

புதிய நாடாளுமன்றக் கட்டடத்தை பிரதமா் நரேந்திர மோடி திறந்து வைத்த நாளில் இந்த வளா்ச்சி ஏற்பட்டுள்ளது. திறப்பு விழாவுக்கு முன்னதாக, புது தில்லி மாவட்டம் கட்டுப்பாட்டுப் பகுதியாகக் கருதப்படும் என்றும், வாகனங்களின் நுழைவுக்குத் தடை விதிக்கப்படும் என்றும் காவல்துறை போக்குவரத்து ஆலோசனையை வழங்கியிருந்தது.

தில்லியின் லுடியன்ஸ் பகுதியில் உயா் பாதுகாப்பு பகுதியில் நாடாளுமன்றக் கட்டடம் அமைந்துள்ளது. கூடுதல் பணியாளா்களை நியமிப்பது மட்டுமின்றி, சிசிடிவி கேமராக்கள் மூலம் தொடா் கண்காணிப்பு பணியும் மேற்கொள்ளப்படுவதாக போலீஸாா் தெரிவித்தனா்.