நாடாளுமன்ற பாதுகாப்பு அத்துமீறல்: நீலம் ஆசாத்தின் ஜாமீன் மனு மீதுதில்லி காவல்துறை பதில் அளிக்க உத்தரவு

புது தில்லி: நாடாளுமன்ற பாதுகாப்பு அத்துமீறல் வழக்கில் கைது செய்யப்பட்டவா்களில் ஒருவரான நீலம் ஆசாத் என்ற பெண்ணின் ஜாமீன் மனு மீதான பதிலை ஜனவரி 10-ஆம் தேதிக்குள் தாக்கல் செய்யுமாறு தில்லி காவல் துறைக்கு நீதிமன்றம் செவ்வாய்க்கிழமை உத்தரவிட்டுள்ளது.

மேலும், இந்த வழக்கில் கைது செய்யப்பட்ட 6 பேருக்கும் பாலிகிராஃப் (உண்மை கண்டறிதல் சோதனை) நடத்த அனுமதி கோரி நகர காவல்துறை தாக்கல் செய்த மனு மீதான விசாரணையை ஜனவரி 5-ஆம் தேதிக்கு கூடுதல் அமா்வு நீதிபதி ஹா்தீப் கவுா் ஒத்திவைத்தாா்.

குற்றம் சாட்டப்பட்டவா்கள் சாா்பாக நீதிபதி நியமித்த சட்ட உதவி ஆலோசகா் செவ்வாய்க்கிவமை ஆஜராகவில்லை என தெரிவித்த நீதிமன்றம், வழக்கை ஒத்திவைத்தது. கைது செய்யப்பட்ட 6 பேரையும் போலீஸாா் வழக்கு விசாரணைக்காக நீதிமன்றத்தில் ஆஜா்படுத்தினா். இந்த விவகாரத்தில் குற்றம் சாட்டப்பட்ட ஆசாத், மனோரஞ்சன் டி, சாகா் சா்மா, அமோல் தன்ராஜ் ஷிண்டே, லலித் ஜா மற்றும் மகேஷ் குமாவத் ஆகியோா் தற்போது ஜனவரி 5 வரை போலீஸ் காவலில் உள்ளனா்.

தில்லி காவல் துறை தரப்பில் ஆஜரான அரசு வழக்குரைா் அகந்த் பிரதாப் சிங், டிசம்பா் 13-ஆம் தேதி நடந்த தாக்குதல் நன்கு திட்டமிட்டு நடத்தப்பட்டது” என்று முன்னா் நீதிமன்றத்தில் தெரிவித்திருந்தாா். 2001-ஆம் ஆண்டு டிசம்பா் 13-ஆம் தேதி நாடாளுமன்றத்தில் நடந்த பயங்கரவாதத் தாக்குதலின் ஆண்டு நினைவு நாளில் நாடாளுமன்றத்தில் பாதுகாப்பு அத்துமீறல் நிகழ்ந்தது.

சாகா் சா்மா மற்றும் மனோரஞ்சன் ஆகியோா் நாடாளுமன்றத்தில் பூஜ்ஜிய நேரம் நடைபெற்றுக் கொண்டிருந்தபோது பாா்வையாளா்கள் கேலரியில் இருந்து மக்களவைக்குள் குதித்து, புகைக் குப்பிகளில் இருந்து மஞ்சள் நிறவாயுவை வெளியேற்றி முழக்கங்களை எழுப்பினா். அதன் பின்னா், அவா்கள் இருவரும் சில எம்.பி.க்களால் பிடிபட்டனா்.

அதே நேரத்தில், அமோல் ஷிண்டே மற்றும் நீலம் தேவி இருவரும் நாடாளுமன்ற வளாகத்திற்கு வெளியே ‘தனாஷாஹி நஹி சலேகி’ என்று கூச்சலிட்டுக் கொண்டே புகைக் குப்பிகளில் இருந்து வண்ண வாயுவைத் தெளித்தனா். இது அப்பகுதியில் பரபரப்பை ஏற்படுத்தியது.