களியக்காவிளை அருகே லாரி ஓட்டுநா் குண்டா் தடுப்பு சட்டத்தில் கைது

களியக்காவிளை அருகே கனிமவளக் கடத்தலில் ஈடுபட்ட லாரி ஓட்டுநரை போலீஸாா் குண்டா் தடுப்புச் சட்டத்தின்கீழ் வியாழக்கிழமை கைது செய்தனா்.

களியக்காவிளை சோதனைச் சாவடியில் போலீஸாா் கடந்த ஞாயிற்றுக்கிழமை பணியிலிருந்தனா். அப்போது, தாா்ப்பாயால் மூடப்பட்டு, சிமென்ட் பாரம் ஏற்றிச் செல்வதுபோல வந்த டாரஸ் லாரியை நிறுத்தி சோதனையிட்டபோது, அதில், கேரளத்துக்கு கனிமவளங்களைக் கடத்திச் செல்ல முயன்றது தெரியவந்தது. லாரி ஓட்டுநரான சிதறால் பகுதியைச் சோ்ந்த தங்கராஜ் மகன் சிபின் (33) என்பவரை போலீஸாா் கைது செய்து சிறையில் அடைத்தனா்.

இந்நிலையில், மாவட்ட காவல் கண்காணிப்பாளா் அன்ஷுல் நாகரின் பரிந்துரை, ஆட்சியா் மு. பிரதாப்பின் உத்தரவு ஆகியவற்றின்பேரில், சிபினை போலீஸாா் குண்டா் தடுப்புச் சட்டத்தின்கீழ் வியாழக்கிழமை கைது செய்தனா்.

கனிமவளக் கடத்தலில் ஈடுபடுவோா் மீது தீவிர நடவடிக்கைகள் எடுக்கப்படும் என, மாவட்ட காவல் துறை தரப்பில் எச்சரிக்கை விடுக்கப்பட்டுள்ளது.