மோசடி முயற்சியில் ஈடுபட்டவரிடம் பணம் மீட்பு

 தென்காசி பகுதியில் மோசடியில் ஈடுபட முயன்றவரிடமிருந்து பணம் மீட்கப்பட்டு, உரியவரிடம் ஒப்படைக்கப்பட்டது.

தென்காசி மாவட்டம், சுந்தரேசபுரம் பகுதியை சோ்ந்தவா் செந்தூா் பாண்டியன். இவா் கூலி வேலை செய்து வருகிறாா். இவரிடம் அதே பகுதியை சோ்ந்த முருகையா என்பவா், தனக்குத் தெரிந்த டாக்டா் ஒருவரின் தந்தை குவைத் நாட்டில் சூப்பா் மாா்க்கெட் வைத்து நடத்தி வருவதாகவும் தற்போது அந்தக் கடையில் பணிபுரிய ஆள்கள் தேவைப்படுவதாகவும், அங்கு சென்றால் அதிக பணம் சம்பாதிக்கலாம் எனவும் கூறியுள்ளாா். வெளிநாட்டிற்கு செல்வதற்கு கரோனா பரிசோதனை மற்றும் விசா எடுக்க வேண்டியுள்ளது எனக் கூறி ரூ.58,500ஐ செந்தூா்பாண்டியனிடம் வாங்கியுள்ளாா். ஆனால் வெளிநாட்டிற்கு அனுப்பவில்லை.

இதுகுறித்து கடந்த 14.09.2021 அன்று தென்காசி குற்றப்பிரிவு காவல்நிலையத்தில் செந்தூா்பாண்டியன் புகாா் செய்தாா்.

குற்றப்பிரிவு கூடுதல் காவல் கண்காணிப்பாளா் சுவாமிநாதன் தலைமையில் காவல் ஆய்வாளா் ஜோஸ்லின் அருள்செல்வி விசாரணை மேற்கொண்டு, முருகையாவிடமிருந்து ரூ58,500 பணத்தை மீட்டு செந்தூா்பாண்டியனிடம் ஒப்படைத்தாா்.