ரயில் பயணிகளிடம் விழிப்புணர்வு பிரசாரம்

திருநெல்வேலி ரயில் நிலையத்தில் பயணிகளுக்கான விழிப்புணர்வு நிகழ்ச்சி ஞாயிற்றுக்கிழமை நடைபெற்றது.
தீபாவளி பண்டிகையையொட்டி, மதுரை கோட்ட ரயில்வே பாதுகாப்பு படை சார்பில்  நடைபெற்ற இந்நிகழ்ச்சியை, ரயில்வே பாதுகாப்பு படை உதவி ஆய்வாளர் ஞானஆனந்த் தொடங்கி வைத்தார். கலைக்குழுவினர் பாடல்கள், நாடகம் மூலம் விழிப்புணர்வு ஏற்படுத்தினர். ரயில்கள் மற்றும் நிலையங்களில் எளிதில் தீப்பற்றக்கூடிய பொருள்கள், பட்டாசுகளை கொண்டு செல்வது ரயில்வே சட்டம் 1989 பிரிவு 164 இன் கீழ் குற்றமாகும். இதற்கு குறைந்தது 3 ஆண்டுகள் வரை சிறைத்தண்டனையும், ரூ.1000 அபராதமும் விதிக்க வாய்ப்புள்ளது. ஆகவே, ரயில் பயணிகள் அரசின் விதிமுறைகளை முறையாகக் கடைப்பிடிக்க வேண்டும் என அறிவுறுத்தப்பட்டது. விழிப்புணர்வுத் துண்டுப்பிரசுரங்களும் விநியோகிக்கப்பட்டன.